Ölkəmizin mədəni həyatında önəmli yer tutan Azərbaycan Milli Xalça Muzeyi 25 yanvar tarixindən etibarən fəaliyyətini bərpa edir. Sərtləşdirilmiş karantin günlərindən sonra vaxtını xoş, səmərəli və maraqlı keçirmək istəyən hər kəs Azərbaycan Milli Xalça Muzeyinə gələrək zəngin və yenilənmiş ekspozisiya ilə tanış ola, möhtəşəm sənət əsərlərinin gözəlliyindən zövq ala bilər.

Bu gün əhalini muzeylərə cəlb etməyin hər zamankından daha aktual olduğunu, həmçinin uşaqların mədəni irsimizə, milli-mənəvi dəyərlərimizə sevgi, hörmət ruhunda tərbiyəsinin əhəmiyyətini və bu işdə təhsilin rolunu nəzərə alaraq, Milli Xalça Muzeyi yeni proqramlar hazırlayıb. Muzeydə həftə içi hər gün uşaqlar, yeniyetmələr və böyüklər üçün bir-birindən maraqlı ustad dərsləri keçiriləcək. Ustad dərslərdə istifadə olunan bütün materiallar muzey tərəfindən təmin edilir və uşaqlar öz əlləri ilə yaratdıqları nümunələri özləri ilə aparırlar. Həftənin çərşənbə günləri muzeyin “Qarabağ” otağında uşaqlar üçün oxu saatı təşkil olunacaq, maraqlı nağıllar oxunacaq.

Azərbaycan Milli Xalça Muzeyinin Uşaq şöbəsi tərəfindən hər həftənin 4-cü günü müxtəlif tamaşalar göstərilir. Muzeyin balaca dostları kilimarası “Şəngülüm, Şüngülüm, Məngülüm”, “Tıq-tıq xanım”, “Cırtdan”, “Məlikməmmədin nağılı” tamaşalarına, surdo tərcümə ilə müşayiət olunan “Cırtdan” kölgə teatrına baxmaq şansı əldə edirlər. 

Həmçinin muzeydə tanınmış mütəxəssislərin ayrı-ayrı mövzulara həsr olunmuş maraqlı mühazirələri təşkil olunur.

Qeyd edək ki, Milli Xalça Muzeyi I-V günlər saat 10.00-dan 18.00-dək açıq olacaq. Mövcud karantin qaydalarına, sanitar normalarına və metodiki göstərişlərin tələblərinə tam riayət olunur, muzeyə 10 nəfərdən çox qruplar buraxılmır. 6 yaşdan aşağı uşaqlar, 65 yaşdan yuxarı qonaqlar, Qarabağ müharibəsi əlilləri və şəhid ailələri üçün muzeyə giriş pulsuzdur.

Beləliklə, 25 yanvar tarixindən etibarən Azərbaycan Milli Xalça Muzeyi sizi gözləyir.

Daha ətraflı məlumat üçün muzeyin sosial şəbəkələrdəki səhifələrini izləyə, (012) 497 20 57,  (+994) 55 860 30 22 nömrələri ilə əlaqə saxlaya bilərsiniz.