Onlayn treninq keçirilib

Azərbaycan Respublikası Mədəniyyət Nazirliyi və “British Council”un (Britaniya Şurası) birgə təşkilatçılığı ilə “Muzeylərdə müyəssərlik və inklüzivlik” mövzusunda onlayn treninqin yekunları ilə bağlı tədbir keçirilib.

Bakı şəhərində və regionlarda fəaliyyət göstərən muzey və qoruqların əməkdaşlarının iştirakı ilə 23-26 fevral tarixində gerçəkləşən təlimin əsas məqsədi muzeylərdə fiziki məhdudiyyətli insanlar üçün bərabərlik, müyəssərlik və inklüzivliyin tətbiq edilməsinə nail olmaqdır.

Treninq “British Council”un incəsənət və əlillik sahəsində həyata keçirdiyi, kimliyindən və fiziki imkanlarından asılı olmayaraq böyük arzuları olan insanlara heç bir məhdudiyyətin qoyulmaması ideyasına əsaslanan dördillik “Limitsiz proqram”ının (Unlimited programm) tərkib hissəsidir.

Tədbiri açan Mədəniyyət Nazirliyi Muzey işi və mədəni sərvətlərə nəzarət şöbəsinin müdiri vəzifəsini müvəqqəti icra edən Nərgiz Abdullayeva Azərbaycan muzeylərində fiziki məhdudiyyətli insanların maneəsiz hərəkəti, eksponatlar haqqında olan məlumatları rahat əldə edə bilmələri üçün inklüziv layihələr və proqramların həyata keçirildiyini bildirib. O, fiziki imkanlarından asılı olmayaraq bütün insanlar üçün muzeylərdəki informasiyaların əlçatan olması məqsədilə inklüziv layihələrin bundan sonra da davam etdiriləcəyini diqqətə çatdırıb: “İnanırıq ki, təlimdə müzakirə edilmiş məsələlər muzeylərin inklüzivlik sahəsində daha uğurlu fəaliyyətinə kömək göstərəcək”.

“British Council”un Azərbaycan üzrə direktoru Samr Şah təlimdə iştirak edən bütün muzeylərin fərqli insanlardan ibarət auditoriya və əlilliyi olan insanlar üçün əlçatan olacağına əminliyini bildirib.

Dörd gün davam edən treninqi İngiltərənin “Goss Consultancy” təşkilatının direktoru Nik Qos aparıb. O, hər gün üç saat davam edən interaktiv sessiyalar zamanı iştirakçılara “Müyəssərlik və inklüzivlik”, “Müyəssərlik və inklüzivlik Azərbaycan muzeylərinin uğur qazanması üçün niyə vacibdir?”, “Müyəssərlik və inklüzivliyi layihələrin həyata keçirilmə prosesinə necə daxil etmək olar?”, “Əlilliyi olan insanlarla necə təmasa girmək, başqa tərəfləri nə vaxt və necə cəlb etmək olar?” və s. mövzular üzrə geniş məlumat verib.

Treninqin sonunda iştirakçılara sertifikatlar təqdim edilib.