1 iyun - “Beynəlxalq uşaqları müdafiə günü” çeşidli tədbirlərlə qeyd olunacaq
   
   Respublika Uşaq Kitabxanasının bayram tədbiri
   
   İyunun 1-də F.Köçərli adına Respublika Uşaq Kitabxanası Azərbaycanın dövlət müstəqilliyinin 20-ci ildönümünə həsr olunmuş uşaq kitab bayramı keçirəcək. R.Zorge adına parkda təşkil olunacaq «Dünyanı verək uşaqlara» adlı kitab bayramında müxtəlif mövzularda kitab sərgiləri təşkil olunacaq. Bayramda “Aysel”, “Canbala” musiqi qrupları, Dövlət Uşaq Filarmoniyasının rəqs qrupu çıxış edəcək.
   
   Kinematoqrafçıların uşaqlara bayram hədiyyəsi
   
   İyunun 1-də Teatr Xadimləri İttifaqının tamaşa zalında “Onun ürəyi” yeni bədii-musiqili filmin təqdimatı və ekran əsərinin yaradıcı heyətinin uşaqlarla görüşü keçiriləcək. 1 iyun - Beynəlxalq Uşaqları Müdafiə Gününə həsr olunan tədbirdə balaca tamaşaçıları filmin nümayişindən əlavə, bir neçə sürpriz də gözləyir.