- 15-04-2016
- 520
Mədəniyyət və turizm naziri BMT baş katibi müavininin rəhbərlik etdiyi nümayəndə heyəti ilə görüşübAprelin 14-də Mədəniyyət və Turizm Nazirliyində BMT-nin baş katibinin siyasi məsələlər üzrə müavini Cefri Feltmanın rəhbərlik etdiyi nümayəndə heyəti ilə görüş keçirilib.
Qonaqları salamlayan mədəniyyət və turizm naziri Əbülfəs Qarayev nümayəndə heyətinin ölkəmizə səfərini yüksək qiymətləndirib.
25-27 aprel tarixində Bakıda keçiriləcək BMT-nin Sivilizasiyalar Alyansının 7-ci Qlobal Forumunun əhəmiyyətinə toxunan nazir, mötəbər tədbirə ev sahibi ölkə kimi Azərbaycanın yüksək səviyyədə hazırlıq işləri gördüyünü diqqətə çatdırıb.
Əbülfəs Qarayev BMT-nin baş katibi Ban Ki Moonun ölkəmizə gözlənilən səfərindən də söz açıb.
Prezident İlham Əliyev tərəfindən 2016-cı ilin Azərbaycanda “Multikulturalizm ili” elan olunduğunu deyən nazir qeyd edib ki, Qlobal Foruma ev sahibliyi edən ölkənin həmin ili BMT-nin Sivilizasiyalar Alyansının ideyalarına həsr etməsi BMT-nin Sivilizasiyalar Alyansının tarixində ilk belə hadisədir. Vurğulanıb ki, Azərbaycan multikultural və tolerant ənənələri özündə daşıyan nümunəvi bir ölkə kimi dünyada tanınır və qarşıdakı forum bunun bir daha təsdiqi olacaq.
BMT-nin baş katibinin müavini Bakıda gördüklərinin onda xoş təəssürat yaratdığını bildirib. Söhbət zamanı bir sıra maraq doğuran məsələlər müzakirə olunub.
Görüşdə Azərbaycanın BMT-dəki daimi nümayəndəsi Yaşar Əliyev də iştirak edib.
