Qlobal Forum çərçivəsində “Mədəniyyətlərarası innovasiya mükafatı”nın təqdimat mərasimi keçirilib

Aprelin 26-da Heydər Əliyev Mərkəzində BMT-nin Sivilizasiyalar Alyansının VII Qlobal Forumu çərçivəsində “Mədəniyyətlərarası innovasiya mükafatı”nın təqdim edilməsi mərasimi keçirilib. Mükafat BMT-nin Sivilizasiyalar Alyansı və “BMW Group” tərəfindən təsis edilib.

Mərasimdə BMT-nin Sivilizasiyalar Alyansı üzrə ali nümayəndəsi Nasir Əbdüləziz Əl-Nasir çıxış edərək dünyada mədəniyyətlərarası dialoqun önəmini bir daha vurğulayıb.
Mədəniyyətlərarası dialoq və insanlar arasında qarşılıqlı anlaşmanın əhəmiyyətinə toxunan ali nümayəndə insanların qarşılıqlı hörmət əsasında yekdil münasibətlərinin qorunub saxlanılmasının vacibliyini vurğulayıb.
“Bir çox sahələrdə inkişafa baxmayaraq, biz hələ də təəssüf doğuran hadisələrlə qarşılaşırıq. Mədəniyyətlərin qütbləşməsi, mədəniyyətlərarası ziddiyyətlər kimi mənfi halların qarşısının alınması ilə yanaşı, mədəniyyətlər və dinlər arasında körpü qurmaq, dialoq yaratmaq, müxtəlifliyi təbliğ etmək Sivilizasiyalar Alyansının əsas missiyasıdır. Bizim dünyamız sürətlə dəyişir. Sülhü qoruyub saxlamaq üçün innovativ olmalıyıq, baryerləri, etimadsızlığı aradan qaldırmalıyıq”, - deyə o diqqətə çatdırıb.
“BMW Group”un kommunikasiya strategiyası, korporasiya və market əlaqələndirilməsi üzrə vitse-prezidenti Bill Mak Endryus çıxış edərək forum çərçivəsində müzakirə olunan məsələlərin mədəniyyətlərarası dialoqun inkişafına mühüm töhfələr verəcəyinə əminliyini ifadə edib. O, “Mədəniyyətlərarası innovasiya mükafatı”nın mədəniyyətlər arasında anlaşmanın daha geniş miqyasda təbliği üçün növbəti uğurlu addım olacağını vurğulayıb.
Daha sonra Sivilizasiyalar Alyansının fəaliyyətinə töhfə verən iştirakçılara mükafatlar təqdim edilib.
Mərasimdə konsert proqramı təqdim olunub. Proqramda Azərbaycan Dövlət Akademik Opera və Balet Teatrının truppası, Azərbaycan Dövlət Uşaq Filarmoniyasının Uşaq-Gənclər Xalq Çalğı Alətləri Orkestri çıxış edib.