Azərbaycan və alman kinematoqrafçıların müştərək işi olan sənədli film təqdim edildi
   
   Noyabrın 14-də Nizami Kino Mərkəzində almaniyalı rejissor Klaus Bernhardtın “Sarı gəlin. Azərbaycanda muğam-caz” filminin təqdimatı keçirildi. Mədəniyyət və Turizm Nazirliyinin dəstəyi ilə Almaniyanın \"Das-Apartment\" prodüser şirkətinin və \"Salnamə\" kinostudiyasının birgə istehsal etdiyi filmin rejissoru Klaus Bernhardt, rejissor assistenti Naibə Şirinova, operatorları Feliks Peşko və Vilhelm Neyman, montajçısı Cennifer Kunçerdir.
   
   Tədbirdə çıxış edən mədəniyyət və turizm nazirinin birinci müavini Vaqif Əliyev Almaniyanın Azərbaycandakı səfirini və qonaqları salamlayaraq layihənin tarixi haqqında danışdı. Qeyd olundu ki, almaniyalı rejissor Klaus Bernhardt bir neçə il əvvəl Mədəniyyət və Turizm Nazirliyinə müraciət edərək muğam və caz sənətimizlə maraqlandığını, muğam-caz sintezi haqqında film çəkmək istədiyini bildirib: “Təklif müsbət qarşılandı. Bu layihə bizim üçün də maraqlı idi. Əvvəla, milli musiqimiz muğama, caz sənətinə kənardan baxış, bu sənət haqqında mülahizələr, daha vacibi isə filmin Azərbaycan hüdudlarından kənarda yayılması bu layihənin üstünlüklərindəndir. Muğam Azərbaycanın milli musiqisinin zirvəsidir. Son illər dövlətimiz tərəfindən bu sənətə diqqət daha da artıb, Beynəlxalq Muğam Mərkəzi tikilib istifadəyə verilib, müxtəlif muğam festivalları, beynəlxalq müsabiqələr keçirilir. Mənşəcə Qərb musiqisi olan caza da Azərbaycanda böyük maraq olub və bu gün də var. Son illər caz musiqisinin inkişafı üçün layihələr həyata keçirilir, Bakıda ənənəvi caz festivalı təşkil olunur. Bu gün fəxrlə deyirik ki, bizim caz ustalarımız Qərbin konsert zallarında uğurla çıxışlar edir, müxtəlif müsabiqələrdə qalib olurlar. Muğam-caz Şərq-Qərb mədəniyyətinin inteqrasiyasını ifadə edir. Ərsəyə gələn film də caz-muğam sintezi haqqında maraqlı ekran əsəridir”.
   Almaniyanın Azərbaycandakı səfiri Herbert Kvelle ekran əsərinin iki ölkənin mədəni əməkdaşlığına növbəti nümunə olduğunu dedi. Filmin ənənəvi musiqini müasir üslubda təqdim etdiyini vurğuladı: “Muğam ustadı Alim Qasımov və cazmen Rain Sultanovla aparılan söhbətlərdə iştirak edərkən mən tanınmış sənət adamlarının həyatını yaxından görə bildim. Ənənəvi musiqini müasir bir formada təqdim etməklə Azərbaycan dünyaya yeni qapılar açacaqdır”.
   Səfir layihənin gerçəkləşməsində Klaus Bernhardtın əməyini xüsusi qeyd etdi, onun bu filmlə «Azərbaycan musiqisinin səfiri» adını daşımağa haqqı olduğunu dedi. Diplomat filmin çəkilişində göstərilən dəstəyə görə Azərbaycan Respublikasının Mədəniyyət və Turizm Nazirliyinə təşəkkürünü bildirdi.
   Tədbirin aparıcısı Rahib Azəri «Sarı gəlin» xalq mahnısı və Azərbaycanda cazın tarixi haqqında qısa məlumat verdikdən sonra filmin yaradıcı heyəti səhnəyə dəvət olundu. Rejissor Klaus Bernhardt muğam və caz sənəti sintezinin gözəl sənət nümunəsi olduğunu dedi: “Biz əvvəllər muğam haqda eşitməmişdik. İndi isə görürəm ki, belə gözəl musiqidən xəbərsiz olmaq düzgün deyil. Ona görə də qərara gəldik ki, muğam, muğam-caz haqqında belə bir film ərsəyə gətirək”. O, filmin adı ilə bağlı fikrini də bildirdi: “Sarı gəlin” çox gözəl bir romantik nəğmədir. Çünki burada sevgidən söhbət gedir”.
   Rejissor Mədəniyyət və Turizm Nazirliyinə, Almaniyanın Azərbaycandakı səfirinə, Azərbaycan Respublikası Kinematoqrafçılar İttifaqına, layihənin sponsorlarına minnətdarlığını ifadə etdi.
   Sonra “Sarı gəlin. Azərbaycanda muğam-caz» sənədli filmi nümayiş olundu. Müəlliflər ənənə və müasirlik qovşağında qərar tutmuş Bakının heyrətamiz təsvirləri, xalq musiqiləri, muğam və caz sintezindən yaranmış mükəmməl melodiyaları ilə tamaşaçını mövzunun ruhuna kökləməyə çalışıblar. Ustad ifaçı Alim Qasımov və Fərqanə Qasımovanın ifa etdiyi muğam parçaları, Sevda Ələkbərzadənin ifasında səslənən müasir muğam-caz filmə xüsusi dinamika gətirir. Fərhad Bədəlbəyli, Rain Sultanov Azərbaycanda caz musiqisi ənənələri haqqında danışırlar. Caz musiqisinin ustadlarından olan Vaqif Mustafazadə də xatırlanır, onun caz-muğam parçaları səslənir. Həmçinin istedadlı pianoçu İsfar Sarabskinin bəstəsi təqdim olunur. Film boyu təqdim olunan təsvirlər Azərbaycanın muğam-caz kimi unikal bir musiqisini vizual olaraq tamamlayır.
   Qeyd edək ki, Azərbaycan dilində çəkilmiş 45 dəqiqəlik film alman və ingilis dillərinə də tərcümə olunub.
   
   Aliyə