İtaliyanın tanınmış kinoaktyorunun 80 illiyi Bakıda qeyd ediləcək

Sentyabrın 9-dan 13-dək Bakıda Adriano Çelentanonun 80 illik yubileyinə həsr olunan “Adriano Çelentano açıq hava film festivalı” keçiriləcək.

İtaliya səfirliyi tərəfindən təşkil edilən festivalda Adriano Çelentanonun çəkildiyi ən məşhur və sevilən filmləri təqdim olunacaq: “Blef”, “Dəlicəsinə aşiq olan”, “Tuz”, “İnadkarın ram edilməsi” və “Məxmər əllər”.

Açıq hava nümayişləri “Landmark Rotunda Roof Garden”in ətrafında keçiriləcək. Film rus subtitrləri ilə orijinal dildə olacaq. Giriş pulsuzdur.

Qeyd edək ki, aktyor, müğənni, bəstəkar, rejissor və şoumen kimi tanınan Adriano Çelentano 1938-ci ildə Milanda doğulub. Uzun və müvəffəqiyyətli karyerası zamanı ümumi tirajı 200 milyonu keçən 40 albomu işıq üzü görüb.

Gənc Çelentano film sənayesində karyerasına Federiko Fellininin 1960-cı ildə ekranlaşdırdığı “Dolce Vita”da rok müğənnisi rolunda başlayıb. 1969-cu ildə Pietro Cerminin “Serafino” filmində baş rolun qəhrəmanı kimi yaratdığı obraz ona şöhrət qazandırıb. Aktyor olaraq Çelentano əksəriyyəti komediya olmaqla təxminən 40 filmdə çəkilib.