Azərbaycan Film Komissiyasının yaradılması bizim üçün gələcək əməkdaşlıq baxımından əlamətdar bir hadisədir.

Bu sözləri “Lenfilm” Kinostudiyasının baş direktoru Fyodor Şerbakov Azərbaycan Film Komissiyasının açılış mərasimində deyib.

“Biz işlərin gedişatını diqqətlə izləyirik. Rusiyanın müxtəlif bölgələrində, həmçinin Sankt-Peterburqda, “Lenfilm” Kinostudiyasında da Film Komissiyası aktiv olaraq fəaliyyət göstərir. Film Komissiyasının yaradılması nəinki milli kinonu inkişaf etdirmək, eyni zamanda dünya kinosuna inteqrasiya etməsi üçün çox vacibdir. Buna görə də Azərbaycanda Film Komissiyasının yaradılması kino sənayesində böyük dəyişikliklərə səbəb olacaq. Dəyişikliklər, ilk növbədə, struktur sahəsinə təsir edəcək ki, bu da Azərbaycanı gözəl bir çəkiliş meydançasına çevirəcək və bütün kinematoqrafçıları rahat bir platformaya dəvət edəcək. Bu, çox vacibdir. Biz bunu artıq müzakirə etmişik və düşünürük ki, ölkənizdə olan kinostudiyalardan nəinki istifadə edəcəyik, eyni zamanda öz həmkarlarımız arasında Azərbaycanın daşıdığı imkanların təbliği ilə məşğul olacağıq”, – deyə Fyodor Şerbakov vurğulayıb.