Mədəniyyət Nazirliyinin sistemində olan kitabxanalar üzrə vakant vəzifələrin tutulması məqsədilə noyabrın 28-də Azərbaycan Milli Kitabxanasında təşkil olunan test imtahanında iştirak etmiş namizədlərin nəticələri bəlli olub.

Nəticələrə əsasən, test imtahanında iştirak edən 319 namizəddən 141 nəfəri keçid balını toplayaraq müsabiqənin müsahibə mərhələsində iştirak etmək hüququ qazanıb. 178 namizəd isə müəyyən edilmiş keçid balından aşağı nəticə göstərərək müsabiqədən keçməyib.

Namizədlər aşağıdakı linkə daxil olmaqla iş nömrələri vasitəsilə test imtahanının nəticələri barədə ətraflı məlumat əldə edə bilərlər.

https://culture.gov.az/medias/media/other/859/neticeler.pdf

Test imtahanından 70 faiz (35 düzgün cavab) nəticə əldə etmiş namizədlər Bakı şəhərində fəaliyyət göstərən kitabxanalar üzrə, 60 faiz (30 düzgün cavab) nəticə əldə etmiş namizədlər Sumqayıt, Gəncə şəhərləri və Abşeron rayonu üzrə fəaliyyət göstərən kitabxanalar üzrə, 50 faiz (25 düzgün cavab) nəticə əldə etmiş namizədlər isə digər inzibati ərazi vahidlərində olan kitabxanalar üzrə vakant vəzifələrin tutulması üçün müsahibəyə buraxılacaqlar.

Test imtahanından keçmiş namizədlərə müsahibənin proqramı, vaxtı və yeri barədə əlavə məlumat veriləcək.

Nəticələrə dair şikayəti olan şəxslər dekabrın 5-dən 7-dək apellyasiya@culture.gov.az elektron poçt ünvanı vasitəsilə nazirliyin Apelyasiya Şurasına müraciət edə bilərlər.