Gənc Tamaşaçılar Teatrı və Bakı Xoreoqrafiya Akademiyasının birgə layihəsi

Oktyabrın 27-də Azərbaycan Dövlət Gənc Tamaşaçılar Teatrında “El bilir ki, sən mənimsən...” adlı ədəbi-musiqili gecə keçiriləcək. Ümummilli lider Heydər Əliyevin 100 illik yubileyinə həsr olunmuş tədbirlər planı çərçivəsində Gənc Tamaşaçılar Teatrı ilə Bakı Xoreoqrafiya Akademiyasının birgə layihəsi belə adlanır.

Hazırda teatrda iki yaradıcı kollektivin iştirakı ilə məşqlər gedir. Layihənin quruluş müəllifi Gənc Tamaşaçılar Teatrının rejissoru Əməkdar artist Nicat Kazımovdur. Elə biz də oktyabrın 27-də səhnədə kimləri görüb kimləri eşidəcəyimiz barədə sualımızı ona ünvanladıq.

Quruluşçu rejissor bildirdi ki, tamaşaçıları çox maraqlı tədbir gözləyir: “Əvvəlcə, tamaşanın adı barədə demək istəyirəm. Ulu öndərin Səməd Vurğunun “Azərbaycan” şeirindən söylədiyi bir bənd hamının yadındadır. Biz həmin şeiri əsas leytmotiv kimi götürmüşük. Bu gözəl şeirin bəndlərinin arasında Heydər Əliyevə həsr edilmiş şeirlər, mahnılar səslənəcək. Həmin mahnıların orijinal versiyalarını isə Bakı Xoreoqrafiya Akademiyası tələbələrinin çıxışları müşayiət edəcək...”.

Əlavə edək ki, “El bilir ki, sən mənimsən...” adlı ədəbi-musiqili tədbirdə ümumilikdə Gənc Tamaşaçılar Teatrının 50-dən çox aktyoru və BXA-nın 70-dən çox tələbəsi çıxış edəcək.

Gülcahan