Astara rayon Heydər Əliyev Mərkəzində Vətən müharibəsi şəhidləri – çavuş Pərvin Salmanzadə, əsgərlər Nihad Əhmədov və Arif Qeybiyevin doğum günlərinə həsr olunmuş “Vətən torpağı şəhidləri ilə ucalır” mövzusunda tədbir təşkil edilib. Çıxışlarda qalib Azərbaycan Ordusunun 44 günlük Vətən müharibəsində düşmən qüvvələrini darmadağın edərək qazandığı şanlı Zəfərdən söz açılıb.

***

Masallı rayon Mərkəzi Kitabxanasında “Yaşıl dünya naminə həmrəylik ili” ilə əlaqədar məktəblilərlə görüş keçirilib.  Çıxışlarda iqlim dəyişikləri, kənar müdaxilələrin ətraf mühitə mənfi təsiri və dünya üçün ciddi təhlükə mənbəyi olan bu problemlərin həll edilməsində təbiətə qayğının vacibliyi haqqında danışılıb. Məktəblilər kitabxananın həyətində yaşıl dünya mövzusunda qurulan sərgi ilə tanış olub, ətraf mühit haqqında zəruri bilgilər əldə ediblər.

***

Quba-Xaçmaz RMİ-nin təşkilatçılığı ilə Quba rayon MKS-nin Mərkəzi Kitabxanasının uşaq şöbəsi tərəfindən Azərbaycanın Milli Qəhrəmanı Natiq Əhmədovun (1969-1991) 55 illiyi ilə əlaqədar məlumat saatı keçirilib. Milli Qəhrəmanın həyatı və döyüş yolu haqqında iştirakçılara məlumat verilib. Sonda fəal oxucular şəhidlərə, Vətənə həsr olunmuş şeirlər söyləyiblər.

***

Qəbələ Dövlət Rəsm Qalereyasının təşkilatçılığı ilə Şuşa şəhərinin 2024-cü il üçün “İslam dünyasının mədəniyyət paytaxtı” elan edilməsi münasibətilə gənc rəssamların sərgisi keçirilib. Sərgidə nümayiş olunan əsərlərdə müəlliflər Qarabağın füsunkar təbiətini, zəngin mədəniyyətini və xüsusilə də Şuşanın tarixi memarlığını əks etdiriblər.

***

Gədəbəy Aşıq Məktəbində rayon mədəniyyət müəssisələri əməkdaşlarının iştirakı ilə şair Gəray Göyyurdun 60 illik yubileyi və kitabının təqdimatı keçirilib. Şairin həyat və yaradıcılığı haqqında məlumat verilib. Rayon Mədəniyyət Mərkəzinin direktoru Elmira Hacıyeva yubilyarı təbrik edib, ona yeni yaradıcılıq uğurları arzulayıb.

Tədbir Gədəbəy aşıqlarının ifaları ilə davam etdirilib. Gəray Göyyurd “Zəfər sənin zəfərindi, sayın Ali Baş Komandan” kitabı haqqında danışıb və şeir nümunələri səsləndirib.

***

Lənkəran-Astara Regional Mədəniyyət İdarəsinin (RMİ) rəisi Bəxtiyar Qılıncovun iştirakı ilə Astara rayon Mədəniyyət Mərkəzində müşavirə keçirilib. Rayonun mədəniyyət müəssisələri əməkdaşlarının iştirak etdikləri müşavirədə görülmüş işlər, mövcud problemlər və qarşıda duran məsələlərlə bağlı danışılıb. Müəssisələrin fəaliyyətinin müasir tələblərə uyğunlaşdırılması, internet resurslarından, sosial şəbəkələrdən səmərəli istifadənin vacibliyi vurğulanıb, müvafiq tapşırıq və tövsiyələr verilib.

N.Məmmədli