Azərbaycan Yazıçılar Birliyinin (AYB) “Natəvan” klubunda istedadlı şair, AMEA Nizami Gəncəvi adına Ədəbiyyat İnstitutu “Ədəbiyyatşünaslıq plyus” Yaradıcılıq Birliyinin əməkdaşı, Prezident təqaüdçüsü İbrahim Yusifoğlunun 70 illiyinə həsr olunmuş “Ömür dastanının boyları” kitabının təqdimatı keçirilib.

Tədbiri giriş sözü ilə AYB-nin katibi, yazıçı Elçin Hüseynbəyli açaraq əlamətdar gün münasibətilə Azərbaycan Yazıçılar Birliyinin rəhbərliyi adından yubilyarı təbrik edib, onun çoxşaxəli yaradıcılığından danışıb.

Tədbirin aparıcısı, şair Kəmaləddin Qədim Naxçıvan ədəbi mühitinin yetirməsi olan İbrahim Yusifoğlunun həyat yoluna nəzər salıb, onun ədəbi fəaliyyətlə yanaşı uzun müddət pedaqoji fəaliyyətlə də məşğul olduğunu söyləyib.

“Ömür dastanının boyları” kitabı haqqında da məlumat verən K.Qədim bildirib ki, nəşrdə İbrahim Yusifoğlunun 70 illik yubileyi münasibətilə yazılan məqalə və şeirlər yer alıb.

AMEA Nizami Gəncəvi adına Ədəbiyyat İnstitutunun elmi katibi filologiya üzrə fəlsəfə doktoru, dosent Aygün Bağırlı, İnstitutun Ədəbi tənqid şöbəsinin müdiri filologiya elmləri doktoru Vaqif Yusifli, “Ömür dastanının boyları” kitabının elmi redaktoru, Nizami Gəncəvi adına Ədəbiyyat İnstitutunun Mətbuat və publisistika şöbəsinin müdiri professor Vüqar Əhməd və başqaları çıxış edərək bildiriblər ki, daim axtarış, poeziyaya sonsuz məhəbbət, şeirdə təzə söz demək, bir kimsəyə bənzəməmək mücadiləsi İbrahim Yusifoğlunu bir şair kimi səciyyələndirən əsas amillərdir.

Yubilyara AMEA-nın Azad Həmkarlar İttifaqının Fəxri fərmanı təqdim edilib.

Sonda çıxış edən İbrahim Yusifoğlu yaradıcılıq fəaliyyətinin yüksək qiymətləndirilməsinə görə tədbirin təşkilatçılarına və iştirakçılarına minnətdarlığını bildirib, yeni şeirlərini səsləndirib.