Bu il Xalq artisti, görkəmli kinorejissor, aktyor, pedaqoq Rza Təhmasibin (1894–1980) anadan olmasının 130 illiyidir.

Oktyabrın 16-da Azərbaycan Dövlət Film Fondunda sənətkarın xatirə gecəsi keçirilib.

Tədbir çərçivəsində Rza Təhmasibin həyat və yaradıcılığını əks etdirən fotosərgi açılıb.

Azərbaycan Dövlət Film Fondunun direktoru Əməkdar incəsənət xadimi Cəmil Quliyev görkəmli sənətkarın yaradıcılıq yoluna qısa nəzər salıb. O, qonaqları Xalq artisti Leyla Bədirbəylinin fondun arxivində saxlanılan əlyazmalarında R.Təhmasib haqqında xatirələri ilə tanış edib.

Əməkdar incəsənət xadimləri, kinoşünaslar Aydın Kazımzadə, Ayaz Salayev, Əməkdar incəsənət xadimi, teatrşünas, professor İlham Rəhimli və kinoşünas Şəhla Əmirli rejissorun kino və teatr fəaliyyəti haqqında danışıblar.

Tədbirdə Rza Təhmasibin vaxtilə Dövlət Film Fondunun arxivinə təhvil verilmiş kinoxronikası və rejissor Musa Bağırovun onun haqqında 1966-cı ildə çəkdiyi “İncəsənət veteranı” filmi təqdim olunub.