Quba-Xaçmaz Regional Mədəniyyət İdarəsinin (RMİ) təşkilatçılığı ilə Quba rayon MKS Mərkəzi Kitabxanasının Uşaq şöbəsi tərəfindən 7 saylı körpələr evi-uşaq bağçasının məktəbə hazırlıq qrupu ilə "Kitab dünyasına səyahət" adlı ucadan oxu keçirilib.  Ucadan oxunun kiçik yaşlı uşaqlara faydasından bəhs edilib. Qeyd edilib ki, bu üsul onlarda öz fikrini düzgün çatdırmaq qabiliyyətini artırır. Uşaqlar "Mənim ilk kitablarım" seriyasından seçmə nağılları maraqla dinləyiblər.

***

Xaçmaz Tarix Diyarşünaslıq Muzeyi və Xaçmaz şəhər akademik Zərifə Əliyeva adına 8 nömrəli məktəb-liseyin birgə təşkilatçılığı ilə "Vətən adlı zirvə" adlı tədbir keçirilib. Çıxışlarda qeyd olunub ki,  Ali Baş Komandan İlham Əliyevin rəhbərliyi ilə qüdrətli Ordumuz 2020-ci ildə 44 günlük Vətən müharibəsi və 2023-cü ildə (19-20 sentyabr) antiterror əməliyyatı nəticəsində Azərbaycanın ərazi bütövlüyünü tam şəkildə bərpa etdi.

Vətən müharibəsində və antiterror əməliyyatında şəhidlik zirvəsinə ucalmış xaçmazlı döyüşçülərə həsr olunmuş videoçarxlar və məktəb-liseyin 6-cı sinif şagirdlərinin ifasında ədəbi-bədii kompozisiya nümayiş olunub.

***

Şirvan şəhər Uşaq musiqi məktəbinin şagirdləri XXII beynəlxalq “Qızıl arı” uşaq yaradıcılığı festivalının II mərhələsinə dəvət alıblar. 2024-cü il oktyabrın 31-dən noyabrın 3-dək Belarus Respublikası Moqilyov vilayətinin Klimoviçi şəhərində keçiriləcək XXII beynəlxalq “Qızıl arı” uşaq yaradıcılığı festivalının “Xalq vokalı” nominasiyası üzrə I təsnifat mərhələsini uğurla keçən məktəbin xanəndəlik ixtisası üzrə 2-ci sinif şagirdi İbrahim Məmmədzadə və 4-cü sinif şagirdi Fatimə Sanıyeva mərhələndə iştirak etmək hüququ qazanıblar.

***

Astara rayon Heydər Əliyev Mərkəzində İlham Əliyevin 2003-cü ildə Azərbaycan Respublikasının Prezident seçilməsi (15 oktyabr) ilə əlaqədar “Vətənə, xalqa və dövlətçiliyə misilsiz xidmətin 21 ili” adlı tədbir təşkil edilib.

Mövzu ilə bağlı film nümayiş olunub. Çıxışlardan sonra tədbir iştirakçıları rəssamlıq dərnəyi üzvlərinin əl işlərindən ibarət sərgiyə baxış keçirilib.

***

Masallı Tarix-Diyarşünaslıq Muzeyinin təşkilatçılığı ilə İntiqam Əsgərli adına şəhər 3 nömrəli tam orta məktəbində "Qədim Azərbaycan tarixində bölgəmizin zəngin xəzinəsi" mövzusunda tarix dərsi keçirilib.

Muzeyin əməkdaşları Dilgüşə Məmmədova və Nazənin Heydərzadə mövzu ilə bağlı şagirdlərə geniş məlumat verib, muzey fondundakı bölgəyə aid eksponatlar – küp, daşdan düzəldilmiş müxtəlif ov alətləri, qablar, çaxmaqdaşları, bəzək, silah əşyalarından nümunələrlə Masallının qədimliyindən bəhs ediblər.

***

Cəlilabad rayon Mərkəzi Kitabxanasında Vətən müharibəsinin şəhid baş leytenantı Əmrah Hüseynlinin doğum günü ilə əlaqədar tədbir keçirilib.

Çıxışlarda 44 günlük Vətən müharibəsində şan-şərəf tarixi yazan igidlərin döyüş yolundan söhbət açılıb. Şəhid Əmrah Hüseynli haqqında videoçarx nümayiş etdirilib.

Sonra şəhər 1 nömrəli tam orta məktəbin II sinif şagirdlərinin ifasında kompozisiyalar təqdim olunub.

Hazırladı: N.Məmmədli