Şirvan şəhərində dahi Azərbaycan şairi Məhəmməd Füzulinin 530 illik yubileyinə həsr olunan “Füzuli dünyasından dünyaya baxış” adlı tədbir keçirilib.

Tədbir şəhər İcra Hakimiyyəti, Şirvan-Salyan Regional Mədəniyyət İdarəsi və Şirvan-Salyan Regional Təhsil İdarəsinin birgə təşkilatçılığı ilə reallaşıb.

Əvvəlcə şəhərin Məhəmməd Füzuli adına mədəniyyət və istirahət parkında dahi şairin büstü önünə gül dəstələri düzülərək, xatirəsi yad edilib.

Şirvan Dövlət Rəsm Qalereyasının təşkil etdiyi Məhəmməd Füzuli yaradıcılığına dair rəsm sərgisinə baxış olub.

Şirvan Şəhər Mədəniyyət Mərkəzində davam edən tədbirdə mədəniyyət nümayəndələri və məktəblilərin ifasında Məhəmməd Füzuli yaradıcılığından nümunələr səsləndirilib, “Meyvələrin söhbəti” kompozisiyası təqdim edilib, şairin qəzəlləri əsasında muğam parçaları ifa edilib.

Çıxışlarda mütəfəkkir şairin həyat və yaradıcılığından bəhs olunub, onun əsərlərinin təkcə Azərbaycan poeziyası üçün deyil, bütövlükdə Şərq və dünya ədəbiyyatı üçün əhəmiyyəti vurğulanıb.