Naxçıvan Dövlət Universitetində (NDU) Ümummilli lider Heydər Əliyevin müəllimi, universitetin ilk rektoru olmuş tarix elmləri namizədi, Əməkdar müəllim, ictimai xadim Əli Əliyevin (1904-1997) 120 illiyi qeyd edilib.

Tədbir iştirakçıları əvvəlcə Naxçıvan şəhər qəbiristanlığında alimin məzarını ziyarət edərək üzərinə tər çiçəklər qoyublar.

Sonra universitetində Əli Əliyevin adına auditoriyanın açılışı olub. Auditoriya alimin həyat yolunu və çoxşaxəli fəaliyyətini əks etdirən şəkillər, elektron resurslar, kitablar və digər elmi-ədəbi mənbələrlə təchiz olunub.

Tədbirdə əvvəlcə Naxçıvan Televiziyasının hazırladığı Əli Əliyevə həsr edilən film nümayiş olunub.

NDU-nun rektoru Elbrus İsayev Əli Əliyevin muxtar respublikada elmin və təhsilin inkişafına verdiyi töhfələrdən danışıb. Bildirilib ki, Ermənistan-Azərbaycan münaqişəsindən bəhs edən əsərlər qələmə alan tarixçinin “Əlincə yaddaşı” əsəri Naxçıvanın tarixi və mədəni irsi haqqında əhəmiyyətli mənbələrdəndir.

AMEA Naxçıvan Bölməsinin sədri akademik İsmayıl Hacıyev qeyd edib ki, Əli Əliyev təhsil sahəsindəki xidmətləri ilə yanaşı, siyasi fəaliyyəti ilə də yaddaşlarda iz buraxıb. O, 1941–1947-ci illərdə Naxçıvan MSSR-in xalq maarif komissarı, maarif naziri, 1951–1967-ci illərdə MSSR Ali Soveti Rəyasət Heyətinin katibi vəzifələrində çalışıb. 1967–1970-ci illərdə Azərbaycan Dövlət Pedaqoji İnstitutunun Naxçıvan filialının (indiki NDU) təşkilatçısı və ilk direktoru olub.

AMEA-nın müxbir üzvü, tarix elmləri doktoru Fəxrəddin Səfərli bildirib ki, Azərbaycan Pedaqoji İnstitutunun Naxçıvan filialının və bütövlükdə Naxçıvan təhsil sisteminin formalaşması Əli Əliyevin adı ilə sıx bağlıdır. Onun universitetdə maddi-texniki bazanın yaradılması, kitabxananın təşkili, tələbə elmi cəmiyyətinin formalaşması və elm xadimlərinin yetişdirilməsi istiqamətində əvəzsiz rolu olub.

Tarix elmləri doktoru, dosent Eynulla Mədətli, fəlsəfə elmləri doktoru, professor Məmməd Rzayev, tarix elmləri doktoru, dosent Xəzər Hüseynov, “Xan Sarayı” Dövlət Tarix-Memarlıq Muzeyinin direktoru Nəzakət Əsədova, Əli Əliyevin nəvəsi, tarix üzrə fəlsəfə doktoru Nail Əliyev alimin elmi-pedaqoji və ictimai fəaliyyətindən danışıb, xatirələrini bölüşüblər.