Naxçıvan Dövlət Universitetinin (NDU) Elmi Kitabxanasında Əməkdar incəsənət xadimi, şair-dramaturq, publisist Hüseyn Razinin (1924-1998) 100 illik yubileyinə həsr olunmuş tədbir keçirilib.

NDU-nun rektoru Elbrus İsayev çıxış edərək Hüseyn Razinin zəngin bədii yaradıcılıq irsi yadigar qoyduğunu bildirib. Deyib ki, universitetin Tarix-filologiya fakültəsinin bir sıra ixtisaslarında şairin yaradıcılığı da tədris edilir, həmçinin tələbələrə diplom və dissertasiya mövzuları kimi araşdırmalara cəlb olunur.

Rektor eyni zamanda şairin irsinin daha geniş təbliği məqsədilə onun haqqında yazılmış məqalələrin yer aldığı toplunun nəşrinin əhəmiyyətli olacağını diqqətə çatdırıb.

Azərbaycan ədəbiyyatı kafedrasının dosenti Xanəli Kərimli Hüseyn Razi haqqında məqalələrini və beş elmi tədqiqat işi olduğunu qeyd edib. O, şairin dramaturgiya və publisistika sahələrində dəyərli nümunələr yaratdığını bildirib.

Azərbaycan dilçiliyi kafedrasının professoru Sədaqət Həsənova ədib haqqında fikirlərini bölüşərək onun Naxçıvan ədəbi mühitindəki yerindən danışıb, şairin bir neçə bədii nümunəsini səsləndirib.

Azərbaycan ədəbiyyatı kafedrasının baş müəllimi, filologiya üzrə fəlsəfə doktoru Seyfəddin Eyvazov Hüseyn Razi pyeslərinin səhnə taleyi barədə söz açıb. Xüsusilə, müəllifin "Arxalı dağlar" və "Odlar diyar" pyeslərinin ideya-bədii xüsusiyyətlərindən danışıb.

NDU-nun Fəlsəfə və sosial iş kafedrasının professoru Məmməd Rzayev atasının yaradıcılığına göstərilən diqqətə görə təşəkkürünü bildirib.

Sonra tələbələr şairin şeirlərini qiraət ediblər. Məmməd Rzayev ədibin “Ömür yolları” kitabını tələbələrə hədiyyə edib.