“Azərbaycan Nəşriyyatları Assosiasiyası” İctimai Birliyi (ANAİB), Mədəniyyət Nazirliyi, Gəncə Şəhər İcra Hakimiyyəti və Gəncə İctimai İştirakçılıq Məclisinin birgə təşkilatçılığı ilə 6-8 dekabr tarixlərində III Gəncə kitab sərgisi keçiriləcək.

“Nizami yurduna kitabla gəlirik!” şüarı altında keçiriləcək sərgi Fikrət Əmirov adına Gəncə Dövlət Filarmoniyasının Urban Mərkəzində təşkil olunacaq.

30-dan çox nəşriyyatın iştirak edəcəyi sərgi çərçivəsində yazarlar Varis, Elxan Elatlı, Şəmil Sadiq, Rövşən Abdullaoğlu, Siyavuş Quliyev, Elgüsel, Nurlan Suvarov, Çinarə Köçərli, tarixçilər Mehdi Gəncəli, Əkbər N.Nəcəf, təlimçilər İlqar Hümbətov, Orxan Şahbaz və müğənni Röyal Musanın iştirakı ilə panel müzakirələr, təqdimatlar, imza mərasimləri, şeir gecələri, uşaqlar üçün nağıl saatları, ustad dərsləri və musiqili proqram təşkil olunacaq.

Sərgi zamanı nəşrlər endirimli qiymətlərlə oxuculara təqdim ediləcək.