Quba -Xaçmaz Regional Mədəniyyət İdarəsinin təşkilatçılığı ilə dekabrın 9-da Bəşir Səfəroğlu adına Quba rayon Mədəniyyət Mərkəzində Azərbaycanın Milli Qəhrəmanı İbad Hüseynovla görüş keçirilib.

Tədbir iştirakçıları əvvəlcə məktəblilərin əl işlərindən ibarət sərgiyə və rayon MKS-nin təşkil etdiyi kitab sərgisinə baxıblar.

Mədəniyyət mərkəzinin "Qəhrəmanla görüş" layihəsi çərçivəsində reallaşan tədbirdə "Art" studiyasının hazırladığı Milli Qəhrəman haqqında film nümayiş olunub.

Çıxışlarda İbad Hüseynovun Birinci Qarabağ müharibəsindəki döyüş yolundan söz açılıb. Xocalı soyqırımını törədənlərdən biri – erməni terrorçusu Monte Melkonyanı cəhənnəmə vasil etmiş qəhrəmanın timsalında Azərbaycan əsgərinin şücaətindən bəhs edilib.

İbad Hüseynov görüş iştirakçılarının suallarını cavablandırıb.

Tədbir mərkəzin "Şahdağ" instrumental ansamblı və solistlərinin, "Rast" muğam üçlüyünün vətənpərvərlik ruhlu ifaları ilə davam edib.