Bu gün Azərbaycanın görkəmli alimi, professor Şirməmməd Hüseynovun anadan olmasının 100 illiyi tamam olur. Bu münasibətlə Cəfər Cabbarlı adına Respublika Gənclər Kitabxanasında Azərbaycanın görkəmli alimi və mətbuat tədqiqatçısı Şirməmməd Hüseynovun həyat və fəaliyyətinə həsr edilmiş elektron məlumat bazası hazırlanıb.

Bu barədə kitabxanadan məlumat verilib.

Bildirilib ki, kitabxananın rəsmi saytında yerləşdirilən elektron bazada alimin “Şərəf” ordeni ilə təltif edilməsi haqqında Azərbaycan Respublikası Prezidentinin Sərəncamı, layiq görüldüyü orden və mükafatlar, Şirməmməd Hüseynov haqqında akademik Rəfael Hüseynovun “Millət yaddaşının keşikçisi”və professor Asif Rüstəmlinin “Cümhuriyyət adamı” kimi məqalələrinin tam mətni, bir sıra görkəmli şəxslərin onun haqqında söylədikləri dəyərli fikirlər yer alır. Elektron məlumat bazasında alimin müəllifi və redaktoru olduğu, ön söz yazdığı kitabların, məqalələrin siyahısı təqdim edilir.

Müəllif haqqında qələmə alınan kitab və məqalələrin yer aldığı elektron bazada alimin xatirəsinin əbədiləşdirilməsinə dair məlumatlar, virtual kitab sərgisi, video və foto qalereyası da sərgilənir.

***

Milli Kitabxanada görkəmli alim, Əməkdar jurnalist, professor, Prezident təqaüdçüsü Şirməmməd Hüseynovun 100 illiyi münasibətilə virtual və ənənəvi kitab sərgisi açılıb.

Kitabxanadan bildirilib ki, sərgidə mətbuat tariximizin tədqiqatçısının fotoları, “Şərəf” ordeni ilə təltif edilməsi haqqında Sərəncam, tərtibçi və redaktor olduğu kitablar yer alıb. Həmçinin sərgilərdə alimin həyat və yaradıcılığı haqqında Azərbaycan və rus dillərində ədəbiyyatlar, dövri mətbuatda çap olunan məqalələri, fenomenal araşdırmaları, elmi tədqiqatları nümayiş olunub.

Virtual sərgi ilə https://anl.az/el/vsb/Sirmemmed_Huseynov/index.htm link vasitəsilə tanış olmaq mümkündür.