İncəsənət ustaları məcburi köçkünlər qarşısında çıxış ediblər

Mədəniyyət və Turizm Nazirliyinin təşkilatçılığı ilə Beyləqan və Füzuli rayonlarında, o cümlədən Xocavənd rayonunun məcburi köçkünləri üçün salınmış şəhərcikdə respublikanın tanınmış incəsənət ustalarının yerli əhali ilə yaradıcılıq görüşləri keçirilir.

Nazirliyin Regionlarla iş sektorundan verilən məlumata görə, tədbirlərin əsas məqsədi işğal altında olan rayonların erməni təcavüzünə məruz qalmış tarix və mədəniyyət abidələrinə, həmin bölgələrin qədim mədəni irsinə diqqətin cəlb edilməsi, məcburi köçkünlərin ölkəmizdə mədəniyyət sahəsində əldə olunmuş nailiyyətlər barədə geniş məlumatlandırılması, gənc nəslin sənət adamları, onların yaradıcılığı ilə yaxından tanış olmasıdır.
Dekabrın 4-də yeni salınmış Xocavənd qəsəbəsində yerləşən rayon Mədəniyyət evində və Beyləqan rayon Mədəniyyət sarayında konsert proqramları təqdim olunub.
Xalq artistləri Simarə İmanova, Cəmilə Bayramova, əməkdar artistlər Zakir Əliyev, Teyyub Aslanov, Azad Şükürov, aktrisa Zülfiyyə İsmayılova, müğənnilər Vüsalə Əsgərova, müğənni-aşıq Solmaz Kosayeva, şair Maarif Soltan, musiqiçilər Altay Niftəliyev, Araz Ağaverdiyev rəngarəng musiqi nömrələri ilə çıxış ediblər.
Yaradıcılıq görüşlərində Azərbaycanı tərənnüm edən mahnılar, şeirlər səslənib, ölkəmizin uğurlu inkişafında ulu öndər Heydər Əliyevin misilsiz xidmətləri xüsusi vurğulanıb.
Tədbirlərdə Xocavənd və Beyləqan rayonlarının rəhbərləri çıxış edərək bu cür tədbirlərin bölgələrin mədəni həyatında mühüm hadisə olduğunu qeyd ediblər. Dekabrın 5-də daha bir konsert proqramı Füzuli rayonunun Horadiz şəhərində keçiriləcək.