Azərbaycan Respublikası Prezidenti İlham Əliyev fevralın 18-də Birinci Türkoloji Qurultayın 90 illik yubileyinin keçirilməsi haqqında sərəncam imzalayıb.
Sərəncamda qeyd edilir ki, 1926-cı ildə Bakıda keçirilən Türkoloji Qurultay türk xalqlarının mədəni inteqrasiyasında yeni mərhələnin təməlini qoymuş diqqətəlayiq hadisələrdəndir. Qurultayda mühüm qərarlar qəbul edilmiş, latın qrafikalı yeni əlifbaya keçidin elmi-metodik prinsipləri işlənib hazırlanmışdır. Həmin əlifbanın ilk kütləvi tətbiqinə məhz Azərbaycanda başlanılması hələ XIX əsrdən etibarən mütərəqqi ziyalılarımızın əlifba islahatı uğrunda fəal şəkildə apardıqları mübarizənin nəticəsi idi. Lakin sovet idarə üsulu çox keçmədi ki, bu prosesin ardıcıl gerçəkləşdirilməsinin qarşısını müxtəlif vasitələrlə aldı. Azərbaycan dövlət müstəqilliyini bərpa etməsindən sonra yenidən latın qrafikalı əlifbaya keçildi.
Ötən dövr türkologiyaya dair araşdırmalar sahəsində yeni konsepsiyaların formalaşdırılması, Azərbaycanın türkoloji araşdırmaların nüfuzlu mərkəzlərindən biri kimi tanınması və türk xalqlarının mədəni-mənəvi birliyinin nəzəri-elmi bünövrəsinin yaradılması ilə əlamətdardır.
Sərəncamda Azərbaycan Milli Elmlər Akademiyasına Təhsil Nazirliyi və Mədəniyyət və Turizm Nazirliyi ilə birlikdə Birinci Türkoloji Qurultayın 90 illik yubileyinə həsr olunmuş tədbirlər planını hazırlayıb həyata keçirmək tapşırılıb.