Bakı Şəhər Mədəniyyət və Turizm İdarəsinin dəstəyi və Binəqədi rayon Mərkəzləşdirilmiş Kitabxana Sisteminin təşkilatçılığı ilə rayon Mərkəzi mədəniyyət evində Dürdanə Ağayevanın “Erməni zindanında səkkiz gün” kitabının növbəti təqdimatı baş tutub.
Kitab gənc yaşında müharibənin - erməni terrorunun amansız qəddarlıqlarının canlı şahidi olan, 1992-ci ilin 26 fevralında Xocalı faciəsində əsir düşmüş müəllifin ağrılı-acılı xatirələridir. Türk dilinə də çevrilən kitabın (tərcüməçi - fəlsəfə elmləri doktoru Mais Əlizadə) yaxın gələcəkdə rus, ingilis və fransız dillərinə də tərcümə olunması nəzərdə tutulur.