"Festivalda nümayiş etdiriləcək tamaşalar hansı prinsip əsasında seçilir" sualına cavab verən Ədalət Vəliyev bildirdi ki, heç bir mövzu və janr məhdudiyyəti yoxdur. Sadəcə, vaxt və tamaşada iştirakçı sayı ilə əlaqədar məhdudiyyət var ki, bunlar da daha çox texniki imkanlar üzündən irəli sürülür. "Üç məkan" festivalının təşkilat komitəsi bu sənət bayramında iştirak etmək istəyən 28 ölkədən 45 teatr kollektivinin yolladığı tamaşaların videolentinə baxdıqdan sonra seçim edib. Sentyabrın 25-dək davam edəcək festivalda ümumilikdə 12 tamaşa göstəriləcək. Bu tamaşaların 8-i Şəkidə, 3-ü Mingəçevirdə, 1 tamaşa isə Bakı şəhərində oynanılacaq.
Səudiyyə Ərəbistanında nəşr olunan "Əl-İttihad" qəzetinin təmsilçisinin ərəb ölkələri ilə Azərbaycanın teatr əlaqələrini necə canlandırmaq barədə sualına cavab olaraq, nazir müavini 6-10 noyabr tarixində Bakıda baş tutacaq IV Beynəlxalq teatr forumunu bu baxımdan əməkdaşlıq münasibətlərinin qurulması üçün mühüm platforma kimi diqqətə çatdırdı.
Moskvadan gəlmiş teatrşünas Valentina Fyodorova ona ünvanlanan "Azərbaycan teatrı barədə nə bilirsiniz və Rusiya-Azərbaycan teatr əlaqələrinin gələcəyini necə görürsünüz?" sualını belə cavablandırdı: "Mən təhsil aldığım illərdə SSRİ xalqlarının teatr tarixi" adlı fənn tədris olunurdu. Odur ki, müəyyən bir dövrə qədər Azərbaycan teatr tarixi barədə məlumatlıyam, sovetlər dönəmindəki qastrollar zamanı da sizin rejissorların hazırladıqları tamaşalara baxmışam. Təəssüf ki, ittifaqın dağılması ilə mədəni əlaqələrimiz qırıldı. Amma indi zaman yetişib, həmin mədəni əlaqələri bərpa etmək lazımdır".
"Mədəniyyət" qəzeti əməkdaşının Səudiyyə Ərəbistanından gəlmiş qonağa ünvanladığı “Bu gün Azərbaycanda "1001 gecə" nağıllarının motivləri əsasında tamaşalar oynanılır. Azərbaycan bəstəkarının "1001 gecə" baleti isə bütün dünyada məşhurdur. Bəs ərəb ədəbiyyatı, dramaturgiyası necə inkişaf edir, ölkələrimiz arasında teatr əlaqələrini necə inkişaf etdirə bilərik?" sualına cavabında İbrahim Assiri bildirdi ki, festivalda Birləşmiş Ərəb Əmirliklərinin teatr truppası çıxış edəcək. Biz kiçikdən böyüyədək hər kəsi maraqlandıra biləcək bir rəqs şousunu sizə nümayiş etdirəcəyik. Ümidvaram ki, Azərbaycan sənətçiləri ilə də işbirliyi qura, hətta birgə musiqili tamaşalar hazırlaya bilərik.
Brifinqdən sonra festivalın iştirakçıları və qonaqları ümummilli lider Heydər Əliyevin Şəkidə ucaldılmış abidəsini ziyarət etdilər.
Festivalın açılışı isə S.Rəhman adına Şəki Dövlət Dram Teatrında keçirildi. Əvvəlcə tədbir iştirakçıları teatrın foyesində teatr tariximizdən bəhs edən fotosərgiyə baxdılar.
Mərasimdə şəhər İcra Hakimiyyətinin başçısı Elxan Usubov, mədəniyyət və turizm nazirinin müavini Ədalət Vəliyev çıxış etdilər.
Sonra Azərbaycan Dövlət Akademik Milli Dram Teatrının kollektivi Xalq artisti Azərpaşa Nemətin quruluşunda Cəlil Məmmədquluzadənin "Ölülər" tamaşasını təqdim etdi. Tamaşada əsas rolları xalq artistləri Nurəddin Mehdixanlı, Hacı İsmayılov, Laləzar Mustafayeva, Əməkdar artist Kazım Abdullayev, aktyorlardan Anar Heybətov, Xədicə Novruzlu və başqaları oynayır.
Teatrsevərlərin alqışlarla qarşıladığı tamaşadan sonra teatrın kollektivinə Şəki Şəhər İcra Hakimiyyətinin xatirə hədiyyəsi və Mədəniyyət və Turizm Nazirliyinin diplomu təqdim olundu.
Sentyabrın 16-da festival çərçivəsində Dubay Bələdiyyə Teatrı “Mirvari günlər” tamaşasını təqdim edəcək.

Gülcahan Mirməmməd
Şəki