Abdulla Şaiq adına Azərbaycan Dövlət Kukla Teatrında daha bir tamaşa ərsəyə gətirilib. Teatrın mətbuat xidmətindən bildirilib ki, alman yazıçısı Stefan Sveyqin “Yad qadının məktubu” novellası əsasında “Unudulmuş kukla” adlı tamaşa hazırlanıb. Böyük yaş qrupu tamaşaçıları və festivallar üçün nəzərdə tutulan tamaşa dekabrın 2-də teatrsevərlərə təqdim ediləcək.
   Səhnələşdirəni və quruluşçu rejissoru Anar Məmmədov, quruluşçu rəssamı Əfşan Əsədova olan tamaşanın ana xəttini uğursuz hislərinə görə cəmiyyətə nifrət bəsləyən qadının iztirabları təşkil edir. Tamaşada teatrın aparıcı aktrisaları Cəmilə Allahverdiyeva (Qadın) və Elmira Hüseynova (Səfil) oynayırlar.