“Avropa avtobus turu” layihəsi çərçivəsində Avropa İttifaqının Azərbaycandakı nümayəndəliyinin və Şəki Şəhər İcra Hakimiyyətinin birgə təşkilatçılığı ilə sentyabrın 23-də Şəki şəhərində “Avropa şəhərciyi” keçirilib.
   “Yuxarı Baş” Dövlət Tarix-Memarlıq Qoruğunun ərazisində təşkil olunan tədbirdə Avropa İttifaqına üzv ölkələrin Azərbaycanda fəaliyyət göstərən səfirliklərinin rəhbərləri və təmsilçiləri, şəhər sakinləri iştirak ediblər.
   İcra hakimiyyətinin başçısı Elxan Usubov qonaqları salamlayaraq, tədbirin Şəkinin mədəni həyatında xoş xatirə kimi qalacağını, sakinlərin Avropa mədəniyyəti və tarixi haqqında yeni biliklər əldə edəcəyini diqqətə çatdırıb.
   Avropa İttifaqının Azərbaycandakı nümayəndəliyinin rəhbəri Kestutis Yankauskas bildirib ki, “Avropa şəhərciyi” ittifaqın üzvü olan ölkələrlə birgə əməkdaşlıq çərçivəsində təşkil olunub. Layihənin məqsədi Avropa ölkələrinə öz mədəniyyət və ənənələrini nümayiş etdirmək imkanı yaratmaqdır.
   Sonra tədbir iştirakçıları Avropa İttifaqına üzv ölkələrin mədəniyyətini, adət-ənənəsini, turizm potensialını əks etdirən guşələrlə tanış olublar.
   Tədbir çərçivəsində uşaq və böyüklər üçün müxtəlif müsabiqələr, yarışlar, əyləncəli şoular təşkil olunub.
   “Avropa şəhərciyi” tədbirlərinə axşam saatlarında təşkil olunan konsert proqramı ilə yekun vurulub.
   Tədbirdə iştirak edən səfirlər yüksək qonaqpərvərliyə görə şəhər rəhbərliyinə və sakinlərə minnətdarlıqlarını bildiriblər. 
   Konsertdə təqdim olunan Azərbaycan və Avropa ölkələri bəstəkarlarının mahnıları, şən musiqilər tamaşaçıların ürəyincə olub.