“Eco Cinema” layihəsi çərçivəsində növbəti film nümayiş olunub
   
   Heydər Əliyev Fondunun vitse-prezidenti Leyla Əliyeva tərəfindən 2011-ci il iyulun 11-də başlanmış IDEA - International Dialogue for Environmental Action (Ətraf Mühitin Mühafizəsi naminə Beynəlxalq Dialoq) kampaniyası “Eco Cinema” layihəsinin icrasını uğurla davam etdirir.
   
   Layihə çərçivəsində IDEA kampaniyasının Azərbaycan Respublikasının Prezidenti yanında Dövlət İdarəçilik Akademiyasında yerləşən Resurs Mərkəzində hər iki həftədən bir tələbələr üçün ətraf mühit məsələlərinə həsr olunmuş filmlər nümayiş etdirilir.
   İyulun 13-də “Eco Cinema” layihəsi çərçivəsində tələbələrə ətraf mühit problemlərinə dair dünya şöhrətli “Böyük möcüzə” (“Big Miracle”) bədii filmi nümayiş olunub. 2012-ci ildə dünya ekranlarına çıxan və qısa zamanda şöhrət qazanan filmin əsas hadisələri ABŞ-ın Alyaska ştatında buz səhralarında baş verir. Filmdə buz tələsinə düşmüş balina ailəsinin xilasından söhbət açılır. Yaxınlıqda yerləşən kiçik şəhərciyin sakinləri də balinaların xilası üçün əllərindən gələni əsirgəmirlər. “Böyük möcüzə” filmi cəmiyyətə təbiətə və onun canlılarına daha çox diqqət və qayğı göstərməyi aşılayır.
   Ekran əsərinin nümayişindən sonra tələbələr arasında Azərbaycanda və dünyada mövcud olan ətraf mühit problemləri ilə bağlı müzakirə aparılıb.