Oktyabrın 25-dən 27-dək Azərbaycan Xalça Muzeyinin ev sahibliyi ilə Bakıda keçiriləcək “Türk dünyasının ortaq dili – naxışlar” III Beynəlxalq simpoziuma Amerika, Avropa və Asiya ölkələrindən çoxsaylı iştirakçılar qatılacaq.

Muzeydən bildirilib ki, “Keçə sənətində kəsişmə nöqtələri” mövzulu simpoziumun məşhur qonaqlarından biri Mərkəzi Asiyanın qadın ayin və mərasimləri ilə bağlı tekstil ənənələrini araşdıran tanınmış amerikalı rəssam və müstəqil tədqiqatçı Kristin Martens (Nyu-York) olacaq.

O, “Sincanda uyğur keçəsi nümunələri: naxışlar, texnika və rituallar” mövzusunda məruzə ilə çıxış edəcək. Sənət nəzəriyyəçisi kimi Kristin Martens Qırğızıstan, Özbəkistan, Tacikistan, Türkmənistan, Qazaxıstan və Monqolustanda çoxsaylı təcrübə proqramlarının təşkilatçısıdır. Kristin Martens bu layihələri Fulbrayt təqaüd proqramı (Fulbright Scholar), fəaliyyət sahəsinə gender təhsili proqramlarının da daxil olduğu Beynəlxalq Tədqiqatlar və Mübadilələr Şurasının (IREX) xətti əsasında və Asiya Mədəniyyət Şurasının qrant alıcısı kimi reallaşdırıb.

Qeyd edək ki, beynəlxalq simpoziumun təşkilatçıları Azərbaycan Respublikasının Mədəniyyət Nazirliyi və Xalça Muzeyidir. Simpoziumun məqsədi Türk dünyasının ümumi irsi sayılan keçə sənətinə həsr edilən elmi tədqiqat işlərinin ideya mübadiləsi, bu sənət növünün adət və ənənələrin qorunması, öyrənilməsi, eləcə də  müxtəlif sahələrdə tətbiq edilməsidir. Tədbir çərçivəsində “Keçəçilik ənənə kimi”, “Keçə müasir incəsənətdə”, “Keçə moda dünyasında bir trend kimi” mövzularında müzakirələr aparılacaq.

Simpozium çərçivəsində iki tematik sərgi, ustad dərsləri, keçə məhsullarının yarmarkası və “fashion show” təşkil olunacaq.