Azərbaycan Milli Elmlər Akademiyası Arxeologiya və Etnoqrafiya İnstitutunun ekspedisiyası Goranboy rayonu ərazisində tunc dövrünə aid yaşayış yeri aşkarlayıb.

İnstitutun aparıcı elmi işçisi, Naftalan-Goranboy arxeoloji ekspedisiyasının rəhbəri, tarix üzrə fəlsəfə doktoru Müzəffər Hüseynov bildirib ki, Naftalan şəhəri və Goranboy rayonu ərazisində geniş arxeoloji tədqiqatlar aparılıb. Tədqiqatlar zamanı rayonun Şəfəq kəndi ərazisində çoxtəbəqəli yaşayış yeri aşkara çıxarılıb. Tunc dövrünə aid olan yaşayış yerinin üzərində antik və orta əsrlərin maddi mədəniyyət nümunələrinə rast gəlinir.

Yaşayış yeri Şəfəq kəndindən 500-600 metr şimal-qərbdə, dərə yatağının sol sahilindədir. Hündür-konusvarı formalı təpədən ibarət olan yaşayış yeri iki hektardan artıq ərazini əhatə edir. Ekspedisiya tərəfindən yaşayış yerinin cənub və şərq yamacında yoxlama qazıntıları həyata keçirilib. Burada tunc, antik və orta əsrlərə aid saxsı və daş məmulatı aşkarlanıb. Tunc dövrünün saxsı məmulatı qara, boz və qonur rəngli küp, küpə, bardaq, boşqab və digər qabların hissələrindən ibarətdir.

Yaşayış yerində arxeoloji qazıntı işlərinin daha da genişləndirilməsi planlaşdırılır.