Bakıda İndoneziyanın müstəqilliyinin 73-cü ildönümü qeyd edilib

Sentyabrın 11-də İndoneziyanın Azərbaycandakı səfirliyi ölkəsinin müstəqilliyinin 73-cü ildönümü ilə əlaqədar rəsmi qəbul təşkil edib.

Tədbirdə əvvəlcə hər iki ölkənin dövlət himnləri səsləndirilib.

Qəbulda çıxış edən səfir Hüsnan Bəy Fənani İndoneziyanın keçdiyi inkişaf yolundan danışıb.

Ölkələrimiz arasındakı əlaqələrdən bəhs edən səfir münasibətlərimizin son illərdə daha da inkişaf etdiyini deyib. O əlavə edib ki, İndoneziya Azərbaycanı özünə dost və tərəfdaş hesab edir. Siyasi və iqtisadi əlaqələr yüksək səviyyədədir. İndoneziya və Azərbaycan arasında 30-dan çox yüksək səviyyəli səfər təşkil edilib. İndoneziya Ermənistan-Azərbaycan, Dağlıq Qarabağ münaqişəsinin həlli məsələsində Azərbaycanı birmənalı şəkildə dəstəkləyir.

Mədəniyyət naziri Əbülfəs Qarayev rəsmi qəbulda çıxış edərək Azərbaycan Hökuməti adından İndoneziya xalqını əlamətdar gün münasibətilə təbrik edib. Bildirib ki, ölkələrimizin əlaqələri sürətlə inkişaf edir. Hər iki ölkə beynəlxalq təşkilatlarda bir-birini dəstəkləyir. Ə.Qarayev İndoneziya ilə Azərbaycan arasında mövcud olan iqtisadi-ticari əlaqələrin daha da inkişaf etdirilməsinin vacibliyini vurğulayıb.

Nazir mədəniyyət sahəsində münasibətlərdən də danışaraq bildirib ki, İndoneziya səfirliyi son iki ildə ölkəmizdə müxtəlif mədəniyyət festivalları keçirir, bu da xalqlarımızın əlaqələrinin güclənməsinə təkan verir. O, ölkələrimiz arasında əməkdaşlığın gələcəkdə daha da inkişaf edəcəyinə əminliyini ifadə edib.

Mərasim bədii proqramla davam edib.