Omanın Sultan Qabus Universitetinin Ədəbiyyat və humanitar fənlər fakültəsinin müəllimi Ehsan Sadiq Məhəmməd Əlləvati və amerikalı professor Bernard Parker Azərbaycan Milli Elmlər Akademiyasının Məhəmməd Füzuli adına Əlyazmalar İnstitutunda olublar.

Qonaqlar institutun ekspozisiya zalı, əlyazmaların bərpası və gigiyenası laboratoriyası ilə tanış olublar.

Ərəbdilli əlyazmalarla daha çox maraqlanan omanlı alimə mövzu haqqında ətraflı məlumat verilib. Bernard Parker institutda saxlanılan ingilis dilində materialların mövzuları ilə maraqlanıb.

Hər iki qonaq Əlyazmalar İnstitutunun zənginliyinə öz heyranlıqlarını bildirərək xatirə kitabına ürək sözlərini yazıblar.