“Sərhədsiz incəsənət” seminarı çərçivəsində noyabrın 25-də Milli İncəsənət Muzeyində “Aşiq Səttar” layihəsinin təqdimatı oldu. Layihə görkəmli fırça ustası Səttar Bəhlulzadənin 110 illik yubileyinə həsr olunub.

Layihədən əvvəl seminar iştirakçılarına Xalq rəssamı Səttar Bəhlulzadə haqqında məlumat verildi.

Səttar Bəhlulzadə yaradıcılığı Azərbaycanın müasir rəngkarlıq tarixinin  xüsusi və parlaq səhifələrindəndir. Sənətsevərlər onun bir çox əsərlərini yaxşı tanısalar da, rəssamın yaradıcılıq taleyinin başlanğıcı haqqında az məlumatlıdırlar.

Azərbaycan Milli İncəsənət Muzeyi dünyanın böyük muzeylərinin təcrübəsindən yararlanaraq, Gənc Tamaşaçılar və Pantomima teatrlarının bədii kollektivləri ilə birgə orijinal teatr tərtibatı təşkil edərək Səttar Bəhlulzadənin incə ştrixlərlə işlənilmiş portreti, həyatı və yaradıcılığı haqqında canlı hekayə təqdim etdi.   Pantomima sənətinin zəngin emosional palitrası, sözsüz dil, hər kəsin anladığı universal dil olaraq təsadüfən seçilməyib. Beləliklə, Səttar Bəhlulzadə zahirən dinməz və özünəqapanmış, daxilən isə güclü, romantik, rəhmli, alicənab, ədalətli, həyatsevən biri idi. Həyat ona min bir əziyyət yaşatsa da, rəssam yüksək yaradıcılıq ruhu ilə ölümsüz əsərlər yaradıb.

Layihənin ideyası Milli İncəsənət Muzeyinə məxsusdur. Kompozisiyanın bədii rəhbəri Gənc Tamaşaçılar Teatrının aktyoru, Əməkdar artist Nofəl Vəliyev, ssenari müəllifi və quruluşçu rejissor Dövlət Pantomima Teatrının aktyoru, Əməkdar artist Bəhruz Vaqifoğludur. Rollarda Bəhruz Vaqifoğlu,  Hilal Dəmirov, Leyla Atayeva çıxış edirdi.

Tamaşada Qara Qarayev, Fikrət Əmirov, Aqşin Əlizadənin musiqi əsərlərindən və Bəxtiyar Vahabzadə, Mikayıl Müşfiqin poeziya nümunələrindən istifadə edilib. Layihənin məsləhətçisi Əməkdar incəsənət xadimi, sənətşünaslıq üzrə fəlsəfə doktoru Ziyadxan Əliyevdir.

Tamaşa seminar iştirakçıları tərəfindən maraqla qarşılandı.