Xəbər verdiyimiz kimi, Beynəlxalq Türk Mədəniyyəti və İrsi Fondunun təşəbbüsü, ölkəmizin İtaliyadakı səfirliyinin dəstəyi ilə bu ölkədə “Nəsimi günləri” keçirilib.

Neapol şəhərində başlanan tədbirlər Roma və Venesiyada davam edib.

Dekabrın 10-da Roma Unitelma Sapienza Universitetində italyan dilinə tərcümə edilmiş “Nəsimi poeziyası” kitabının təqdimat mərasimi keçirilib.

Tədbirdən əvvəl Beynəlxalq Türk Mədəniyyəti və İrsi Fondunun prezidenti Günay Əfəndiyeva Roma Sapienza Universitetinin rektoru, Sapienza Fondunun rəhbəri Antonello Biacini ilə görüşüb. G.Əfəndiyeva rəhbərlik etdiyi təşkilat haqqında ətraflı məlumat verərək, gələcəkdə universitetdə “Türk Dünyası Mərkəzi”nin yaradılmasını təklif edib. Görüşdə Azərbaycanın İtaliyadakı səfiri Məmməd Əhmədzadə də iştirak edib.

Tədbiri açan universitetin professoru Daniel Pommier Vinçelli Azərbaycan mədəniyyətinin İtaliyada təbliği istiqamətində Roma Sapienza Universitetinin fəaliyyətindən, keçirilən tədbirin əhəmiyyətindən danışıb.

Universitetin professorları Fabio Qrassi və Karlo Çereti Nəsiminin həyat və yaradıcılığından bəhs edərək, onun ədəbi irsinin dünya səviyyəsində araşdırılmasının vacibliyini vurğulayıblar.

Günay Əfəndiyeva dahi şairin 650 illiyinin qeyd olunması və “Nəsimi ili” ilə bağlı Azərbaycanda görülən işlər barədə məlumat verib, həmçinin Beynəlxalq Türk Mədəniyyəti və İrsi Fondunun məqsəd və fəaliyyətindən söz açıb.

Azərbaycanın İtaliyadakı səfiri Məmməd Əhmədzadə dünya poeziyasının kamil nümunələri sırasında xüsusi yer tutan dahi mütəfəkkir Nəsimi yaradıcılığına həsr olunmuş bu təqdimatın təşkilinə görə Roma Sapienza Universitetinin rəhbərliyinə təşəkkürünü bildirib, bu kimi tədbirlərin Azərbaycanla İtaliya arasında humanitar və akademik sahələrdə münasibətlərin genişləndirilməsinə xidmət göstərdiyini vurğulayıb.

“Sandro Teti” nəşriyyat evinin rəhbəri Sandro Teti Azərbaycan mədəniyyətini, ədəbi irsini təşviq edən nəşrlərdən söz açaraq, Beynəlxalq Türk Mədəniyyəti və İrsi Fondu ilə əməkdaşlığı yüksək qiymətləndirib. O eyni zamanda Azərbaycanın İtaliyadakı səfirliyinin bu istiqamətdə gördüyü işləri təqdirəlayiq hesab edib.

Nəsiminin əsərlərinin italyan dilinə tərcüməçisi Marilena Rea kitabın ərsəyə gəlməsindən danışıb.

Tədbirdə Nəsiminin həyat və yaradıcılığı ilə bağlı Beynəlxalq Türk Mədəniyyəti və İrsi Fondu tərəfindən hazırlanmış “Əbədi eşq günəşi” adlı sənədli film nümayiş olunub. Xalq artisti Mehriban Zəkinin, eləcə də italyan tələbələrin ifasında Nəsiminin şeirləri səslənib.

***

İtaliyada “Nəsimi günləri”nin son tədbiri dekabrın 11-də Venesiya şəhərinin Ka’ Foskari (Ca’ Foscari) Universitetində keçirilib.

Tədbirdən əvvəl Beynəlxalq Türk Mədəniyyəti və İrsi Fondunun prezidenti Günay Əfəndiyeva ilə universitetin rektoru Michele Bugliese arasında görüş keçirilib. Görüşdə gələcək əməkdaşlığa dair razılıq əldə olunub.

Tədbirdə Beynəlxalq Türk Mədəniyyəti və İrsi Fondunun prezidenti Günay Əfəndiyeva, Azərbaycanın İtaliyadakı səfiri Məmməd Əhmədzadə, Ka’ Foskari Universitetində azərbaycanşünaslıq fəaliyyətinin rəhbəri, professor Karlo Frappi, İtaliyanın tanınmış türkoloq alimi Can Piero Bellinceri, Azərbaycanın Xarici İşlər Nazirliyi Beynəlxalq İnkişafa Yardım Agentliyinin rəis müavini Aliyə Ağazadə çıxış ediblər.

Bədii hissədə şairin həyat və yaradıcılığını əks etdirən “Əbədi eşq günəşi” adlı sənədli film nümayiş olunub. Tədbir Xalq artisti Mehriban Zəkinin ifasında və professor Can Piero Bellincerinin şərhləri ilə Nəsiminin şeirlərinin bədii-musiqili kompozisiya formasında təqdimatı ilə yekunlaşıb.