![](/img/news/700x420/_1604058984.jpg)
İsrailin “The Jerusalem Post” qəzetində Azərbaycanda və Ermənistanda yəhudilərin yaşayışından bəhs edən məqalə dərc olunub.
Müəllif Roman Qurieviç oktyabrın 8-də Azərbaycanda yaşayan Aşkenazi yəhudilərinin Azərbaycan Ordusunun Qarabağ uğrunda müharibədə qalib gəlməsi üçün bir yerə toplaşaraq dua etdiklərini bildirir.
Yazıda qeyd olunur ki, Bakının bir çox yerlərində yəhudi alimlərinin şərəfinə abidələr ucaldılıb. Məqalədə ermənilərin tarixən Azərbaycanda sülh şəraitində yaşadıqları diqqətə çatdırılır. Minlərlə azərbaycanlının isə Ermənistandakı yaşayış yerlərindən qovulduğu qeyd edilir.
Müəllif “Pew” Araşdırma Mərkəzinə istinadla antisemitizm indeksinə görə Ermənistanın keçmiş sovet ölkələri arasında ən yüksək pillədə olduğu vurğulanır. Yerevandakı Holokost abidəsinin dəfələrlə vandalizm aktlarına məruz qaldığı diqqətə çatdırılır. Vurğulanır ki, Ermənistan nasizmin tərəfdarlarına milli qəhrəman kimi baxır.
Müəllif fikirlərini yekunlaşdıraraq Azərbaycan və Ermənistan haqqında bunları deyir: “Müharibənin iki tərəfində biz nə görürük? Bir tərəfdə heç vaxt antisemitizmin olmadığı, İsraili enerji resursları ilə təmin edən və öz ərazi bütövlüyü uğrunda mübarizə aparan Azərbaycan, digər tərəfdə isə antisemitizmin mövcud olduğu, qapalı və monoetnik, qonşusunun torpaqlarını işğal etmiş və mülki əhalini atəşə tutan Ermənistan”.