![](/img/news/700x420/_1606455902.jpg)
Mədəniyyət Nazirliyi, Azərbaycan Rəssamlar İttifaqının dəstəyi, Azərbaycan Dövlət Rəsm Qalereyası, “İWS Azerbaijan” və Xətai Sənət Mərkəzinin təşkilatçılığı ilə Vətən müharibəsində qələbəmiz münasibətilə qrafika və akvarel ustaları arasında “Can Azərbaycan” Respublika Yaradıcılıq Müsabiqəsi elan olunub.
Dövlət Rəsm Qalereyasından bildirilib ki, müsabiqənin məqsədi akvarel və qrafika texnikası ilə çəkilmiş əsərlərə marağı artırmaq, rəssamların yaradıcılığında ölkəmizin tərənnümü, Ali Baş Komandanın rəhbərliyi altında Azərbaycan Ordusunun Vətən müharibəsində göstərdiyi rəşadəti, azərbaycançılıq məfkurəsi və milli birliyimizi təsviri sənətdə əks etdirməkdir.
Müsabiqədə Azərbaycan və xarici ölkələrdən olan qrafika və akvarel ustaları iştirak edə bilərlər. Bütün işlər orijinal olmalıdır. İştirakçı ən çox 3 əsəri ilə qatıla bilər.
Əsərləri Xətai Sənət Mərkəzinin “Facebook” qrupunda müəllif və əsər haqqında müvafiq məlumatları qeyd etməklə 2021-ci ilin 5 mart tarixinədək onlayn qaydada yerləşdirmək xahiş olunur. İlk seçim onlayn qaydada aparılacaq. Seçilmiş əsərlərin müəllifləri sərgidə iştirak etmək üçün dəvət ediləcək.