Nizaminin həyat və yaradıcılığına dair sənət nümunələri ilə bağlı hekayə müsabiqəsi

Azərbaycan Respublikası Prezidentinin 5 yanvar 2021-ci il tarixli sərəncamına əsasən, 2021-ci ilin “Nizami Gəncəvi İli” elan edilməsi, habelə dahi Azərbaycan şairinin 880 illik yubileyi münasibətilə Mədəniyyət Nazirliyi Nizami Gəncəvinin həyat və yaradıcılığının əks olunduğu sənət nümunələri – muzey eksponatlarının ən yaxşı hekayəsi ilə bağlı müsabiqə elan edir.

Sənətkarlar zaman-zaman öz yaratdıqları əsərlərin üzərində Nizami Gəncəvinin poemalarından misralar və ya süjetlər həkk etmişlər. Məhz bu səbəbdəndir ki, ölkəmizdə, o cümlədən dünya muzeylərində Nizami Gəncəvi yaradıcılığını, xüsusilə “Xəmsə” motivlərini əks etdirən nadir eksponatlar qorunur.

Müsabiqənin təşkilində əsas məqsəd daim insanları əxlaqi kamilliyə çağıran, yüksək mənəvi keyfiyyətlər aşılayan və maarifləndirici xüsusiyyətləri özündə əks etdirən Nizami Gəncəvi yaradıcılığının, eləcə də “Xəmsə” motivli nadir eksponatların təbliği, muzey sahəsində cəmiyyətdə yaradıcılıq fəaliyyətinin inkişaf etdirilməsi, istedadlı müəlliflərin aşkara çıxarılması, mədəniyyətimizə marağın artırılmasıdır.

Müsabiqədə 14 eksponat təqdim edilir. İştirakçı eksponatlardan birini seçərək ona həsr olunmuş hekayə yazmalıdır. Təqdim olunan eksponatlar arasında seçim etmək sərbəstdir. Eksponatları bit.ly/3dxRQMj linkinə daxil olaraq seçmək mümkündür. Muzey eksponatı barədə hekayənin yazıldığı dil ilə bağlı məhdudiyyət yoxdur.

Şərtlər isə çox sadədir:

1. Museum.az (Facebook) və museum.az (İnstagram) səhifələrini izləmək və bəyənmək;
2. Bu postu öz səhifənizdə paylaşmaq;
3. Eksponatdan birini seçib öz hekayəni yazmaq;
4. Hekayədə maksimum 2000 sözdən istifadə etmək;
5. Ad və soyad, təvəllüd və əlaqə nömrəsini qeyd etməklə 2021-ci ilin 30 may tarixinədək info@museum.az elektron poçt ünvanına göndərmək.

Müsabiqənin qalibi mobil telefon (Samsung Galaxy A41) qazanacaq və Mədəniyyət Nazirliyinin diplomu ilə təltif ediləcək.

Eyni zamanda ilk üçlüyə daxil olan digər iştirakçılar da hədiyyə əldə etmək şansı qazanacaq və Mədəniyyət Nazirliyinin diplomları ilə təltif ediləcəklər.