Xocavənd rayonunun işğaldan azad edilən Tuğ kəndindəki qədim alban məbədi uzun illərdən sonra əsl sahibləri olan udilər tərəfindən ziyarət edilib.

Alban-Udi Xristian Dini İcmasının üzvləri aprelin 17-də ulu əcdadlarından miras qalan Müqəddəs İohann kilsəsində olublar. Onlar burada dini ayin icra edərək şamlar yandırıb, dualar oxuyublar.

İcmanın sədr müavini Rafik Danakari açıqlamasında bildirib ki, bu kilsə qədim Alban dövlətinə məxsus tikilidir: “Azərbaycan Prezidentinin dediyi kimi, bu kilsə artıq azaddır və əsl sahibləri tərəfindən ziyarət edilir. Tuğ kəndində dini məbədlər çoxdur, onlardan üçü alban məbədidir. İşğal dövründə ermənilər Müqəddəs İohann kilsəsində də saxtakarlıq etməklə onu özününküləşdirməyə çalışıblar. Burada erməni dilində yazılar yazıblar, altar (mehrab) hissəni dəyişdiriblər. Onlar nə etsələr də, tarixi dəyişə bilməzlər”.

Səfərdə iştirak edən Bakı Beynəlxalq Multikulturalizm Mərkəzinin icraçı direktoru Rəvan Həsənov isə söyləyib ki, artıq tarixi ədalət bərpa olunub. “XII-XIII əsrlərə aid olan məbəd alban-udiləri qarşılayır. Uzun illərdən sonra onlar öz ata-babalarından yadigar qalan məbədlərində dini ayin icra etdilər. Gördük ki, ermənilər bu kilsəni də mənimsəməyə çalışıblar. Buraya gətirilmiş erməni yazısı olan daşların yeni olduğu ilk baxışdan görünür. Bu irsin, bu torpaqların azərbaycanlılara aid olduğu hər kəs tərəfindən etiraf edilir”, - deyə R.Həsənov bildirib.

Bakı Beynəlxalq Multikulturalizm Mərkəzinin icraçı direktoru qeyd edib ki, Alban Həvari Kilsəsinin əsl varisləri olan alban udilər öz dini inanclarını qoruyub saxlamaqla tolerant və multikultural Azərbaycan cəmiyyətində yaşadırlar: “Bunun bariz nümunəsidir ki, bu gün alban məbədini birlikdə ziyarət edirik. Prezidentimizin də dediyi kimi, işğaldan azad edilən ərazilərdə bərpa işləri aparılır, o cümlədən bu məbədlər də bərpa edilərək əsl varislərinə geri qaytarılacaq”.

Qeyd edək ki, Xocavənd rayonunun Tuğ kəndində yerləşən Müqəddəs İohann kilsəsi tarix-memarlıq abidəsi olaraq Azərbaycan Respublikası Mədəniyyət Nazirliyi tərəfindən ölkə əhəmiyyətli abidə kimi qeydiyyata alınıb.