19-21 sentyabr tarixində Polşanın Varşava Universitetinin təşkilatçılığı ilə “Türk dünyası araşdırmaları – multidisiplinar perspektivlər” adlı VI Beynəlxalq Türkologiya Konqresi keçirilir.

Beynəlxalq Türk Mədəniyyəti və İrsi Fondu, Azərbaycan, Türkiyə, Qazaxıstan və Özbəkistanın Polşadakı səfirlikləri, eləcə də Yunus Əmrə İnstitutu (Türkiyə), Karaim İrsi Fondu (Polşa) konqresin təşkil olunmasında əsas tərəfdaş qismində çıxış edirlər. Beynəlxalq Türk Mədəniyyəti və İrsi Fondunun prezidenti Günay Əfəndiyeva konqresdə fəxri qonaq qismində iştirak edir.

Konqresdə türk xalqlarının tarixi, siyasəti, iqtisadiyyatı, incəsənəti, dili və ədəbiyyatı, o cümlədən bu gün və keçmişdə türklərin yaşadıqları coğrafi ərazilər, bu sahədə həyata keçirilən müasir araşdırmalar və tədqiqatlar ətrafında müzakirələrin aparılması gözlənilir.

Konqres çərçivəsində Azərbaycanın və Türk dünyasının mədəniyyət paytaxtı olan Şuşa şəhərinə həsr olunacaq panelin keçirilməsi və Şuşanın tarixi, ictimai, siyasi, mədəni həyatını əks etdirən nadir fotolar əsasında sərginin təşkil edilməsi, muğam triosunun çıxışı, eləcə də milli mətbəx nümunələrinin təqdim edilməsi nəzərdə tutulur.

Konqres çərçivəsində, AMEA-nın Nizami Gəncəvi adına Ədəbiyyat İnstitutunun əməkdaşı Gülər Abdullabəyovanın XIX əsrdə Azərbaycan-Polşa ədəbi əlaqələrindən bəhs edən kitabının təqdimatı da keçiriləcək.