25 il öncə çəkilən fotolardan ibarət vizual instalyasiya

Bakıdakı “The Landmark” hotel və biznes mərkəzində dünya şöhrətli fotoreportyor  Reza Deqatinin “Caspian Dream” (“Xəzər röyası”) adlı sərgisi açılıb.

Noyabrın 1-də açılışı keçirilən sərgidə Reza Deqatinin 1997-ci ildə çəkdiyi 7 fotoşəkildən ibarət vizual incəsənət instalyasiyası nümayiş olunub.

Tədbirdə R.Deqati fotolarına tarixi kontekstdə şərhlər verib: “Ötən əsrin 90-cı illərində, Birinci Qarabağ müharibəsi gedən zaman tez-tez Bakıya gələrdim, məcburi köçkünlərlə görüşüb onlara yardım göstərərdim. Həmin dönəmdə 6 ay ərzində bütün Xəzəryanı ölkələrə səfərlər edib, şəkillər çəkirdim. Xəzərin möhtəşəmliyini lentə alarkən bu hövzədə çalışan neftçilərin, sahilboyu yaşayan insanların həyatını qabartmağa çalışırdım. Bayıl qəsəbəsində yurdundan didərgin düşən və yeməyə ərzaq tapmayan camaatın sübh tezdən balıq tutduqları anı dünya ictimaiyyəti ilə bölüşmək istəyirdim. Yaxınlaşıb onlarla söhbət edərkən bir gün Azərbaycanın qüdrətli bir ölkəyə çevriləcəyini deyirdim. Onları inandırmağa çalışırdım ki, Azərbaycan düşmənə qalib gələcək və öz torpaqlarını işğaldan azad edəcək”.

Sərginin təsadüfən “The Landmark” binasında keçirilmədiyini deyən Reza Deqati bildirib ki, 20-ci mərtəbədən açılan Xəzərin möhtəşəm mənzərəsi həm insanın diqqətini çəkir, həm də fotolara bir növ yeni çalar qatır: “Dünyanın bir çox ölkələrində binaların divarlarını iriölçülü fotolarla bəzəmişəm. Bu dəfə də həmin niyyətimi neft şəhəri Bakıda, ancaq binanın xaricində deyil, interyerində gerçəkləşdirmək istədim. Ümid edirəm, arzum yerinə yetdi”.

Qeyd edək ki, Reza Deqatinin karyerası haqqında danışanda ağıla üç söz gəlir: xeyriyyəçi, idealist və humanist. R.Deqati fotoreportyorluğa başlamazdan əvvəl memar kimi təhsil alıb. Bəşəriyyət tarixinin əsas anlarını tuta bilməsi üçün uzun yola çıxmasının nəticəsi olaraq onun əsərləri yüzdən çox beynəlxalq mediada dərc olunub. O, bununla bütün dünyada fotolarından ibarət böyük instalyasiyalarını nümayiş etdirir, eyni zamanda universitetlərdə və beynəlxalq təşkilatlarda keçirilən konfranslarda mühazirəçi kimi çıxış edir.