Milli Kitabxanada akademik Zərifə Əliyevanın 100 illiyi münasibətilə sərgi

Aprelin 28-də Azərbaycan Milli Kitabxanasında görkəmli oftalmoloq-alim, akademik Zərifə xanım Əliyevanın anadan olmasının 100-cü ildönümü münasibətilə tədbir və “Qaranlığa nur saçan zəka – Zərifə Əliyeva” adlı kitab sərgisi keçirilib.

Tədbirdə görkəmli alimin özünün çoxillik fəaliyyəti dövründə neçə-neçə gözə şəfa bəxş etdiyi, ən ağır, mürəkkəb əməliyyatlar aparıb görmə qabiliyyəti zəif olanların, yaxud tamamilə görməyənlərin qaranlıq dünyasını işıqlandırdığı bildirilib. Qeyd edilib ki, bu işdə ona təkcə biliyi, savadı və səriştəsi deyil, həm də gendən və böyüdüyü ailədən irəli gələn yüksək keyfiyyətləri güc verirdi.

Diqqətə çatdırılıb ki, görmə orqanının peşə patologiyası sahəsində apardığı elmi tədqiqat işlərinin uğurlu nəticələrinə görə akademik Zərifə Əliyeva keçmiş SSRİ-nin oftalmologiya sahəsində ən mötəbər mükafat olan SSRİ Tibb Elmləri Akademiyasının M.İ.Averbax adına mükafatına layiq görülüb. Keçmiş SSRİ-də bu mükafatı alan ilk qadın alim kimi onun adı oftalmologiya elminin tarixinə düşüb.

Vurğulanıb ki, Ulu öndər Heydər Əliyevin ömür-gün yoldaşı olan Zərifə xanım görkəmli alim olmaqla yanaşı, həm də fəal ictimai xadim, qayğıkeş ana idi. Zərifə xanımın ən gözəl xidmətlərindən biri İlham Əliyev kimi böyük bir insanı, bütün dünyada tanınan siyasətçini Azərbaycan xalqına bəxş etməyi olub.

Tədbir çərçivəsində “Qaranlığa nur saçan zəka – Zərifə Əliyeva” adlı kitab sərgisinin açılışı olub. Sonda tədbir iştirakçıları sərgiyə baxıblar.