Oktyabrın 24-də Azərbaycan Respublikasının mədəniyyət naziri Adil Kərimli bu il anadan olmasının 85 illiyi qeyd olunan görkəmli muğam ustadı, Xalq artisti, Prezident təqaüdçüsü Arif Babayevi evində ziyarət edib.

Nazir Arif Babayevin əlamətdar yubileyinin müxtəlif tədbirlərlə qeyd edildiyini deyib, Prezident İlham Əliyevin 21 fevral 2023-cü il tarixli sərəncamı ilə onun “Azərbaycan Respublikası Prezidentinin fəxri diplomu”na layiq görülməsinin sənətkarın fəaliyyətinə göstərilən diqqətin təzahürü olduğunu bildirib.

Sonra dövlət təltifi xanəndəyə təqdim edilib.

Arif Babayev sənətinə verilən yüksək qiymətə və Azərbaycan muğamının inkişafına göstərdikləri diqqət və qayğıya görə Prezident İlham Əliyevə və Birinci vitse-prezident Mehriban Əliyevaya minnətdarlığını bildirib.

Xatırladaq ki, ustad xanəndə “Şöhrət” (1998), “İstiqlal” (2008) və “Şərəf” (2018) ordenləri ilə təltif olunub. 2010-cu ildə Heydər Əliyev Fondunun “Qızıl çinar” beynəlxalq mükafatına layiq görülüb. 2002-ci ildən Prezident təqaüdçüsüdür.