Parisdəki Pikasso Muzeyi rəssamın minlərlə əsərini – esselərini, şeirlərini, müsahibələrini və digər xatirələrini, o cümlədən ictimaiyyət tərəfindən heç vaxt görülməmiş əşyaları rəqəmsallaşdırıb.

Muzeyin yaratdığı yeni onlayn arxiv sayəsində kubizmin banisinin əsərlərinin zəngin ekspozisiyasına indi internet bağlantısı olan istənilən yerdən daxil olmaq mümkündür.

Pikasso Muzeyinin rəqəmsal portalı istifadəçilərə bir neçə kateqoriya üzrə sənət əsərlərini – fotoşəkillər, audiovizual materiallar, rəsmlər, heykəllər, 3D obyektlər, qravüralar, kitablar, arxivlər və sənədləri axtarmağa imkan verir.

Onlayn arxivlər muzeyin bu ayın əvvəlində açılan “Pikasso: Uduzan şəkillər” sərgisi ilə birlikdə debüt edib. Sərgidə Pikassonun çoxsaylı ilham mənbələri, o cümlədən Rembrandt və Anri Matissin (Henri Matisse) əsərləri, həmçinin jurnallar, komikslər və açıqcalar kimi gündəlik əşyalar araşdırılır.

Sərginin kuratoru, sənət tarixçisi Sesil Qodfruanın qeyd etdiyi kimi, Pikasso Paris muzeylərində şəxsən gördüyü yeni obrazların və əsərlərin axınında böyüyüb.

Muzeyin açıqlamasında deyilir: “Beləliklə, Pikassonun əsərləri başlanğıc şəkillərinin mürəkkəb qarışığından yaranır. Sərgi bu təsirləri Pikassonun karyerası boyu qayıtdığı dörd mövzunun obyektivindən araşdırır...”.