16-19 avqust tarixlərində Çuvaş Respublikasının (Rusiya Federasiyası) Çeboksarı şəhərində “Nağıllar karuseli” V Beynəlxalq Kukla Teatrları Festivalı və IX “Biz hamımız eyni olmağa məcbur deyilik” mövzusunda Beynəlxalq təhsil teatrı festival-forumu keçirilib.

Festivalda Rusiyanın 15 regionu, eləcə də Azərbaycan və Qazaxıstan teatrları təmsil olunub.

Ənənəvi festival bu il Çeboksarı şəhərinin yaradılmasının 555, görkəmli rus şairi A.S.Puşkinin anadan olmasının 225 və II Dünya müharibəsində Leninqradın (Sankt-Peterburq) mühasirədən azad olunmasının 80 illiyinə həsr edilib.

Naxçıvan Dövlət Kukla Teatrının direktoru Xalq artisti Şirzad Abutalıbovun iştirak etdiyi festivalda dramaturq Vüqar Haqverdiyevin “Saçları səməni oğlan” tamaşası videoformatda nümayiş olunub.

Festivalın bağlanış mərasimində Çuvaşiya Dövlət Kukla Teatrının direktoru Əməkdar mədəniyyət işçisi Yelena Abramovaya NMR Mədəniyyət Nazirliyi və Naxçıvan Dövlət Kukla Teatrı adından təşəkkürnamə təqdim olunub.