Bu il dahi Azərbaycan şairi və mütəfəkkiri İmadəddin Nəsiminin (1369–1417) anadan olmasının 655 illik yubileyidir.

Bu münasibətlə Sumqayıt şəhər Gənclər Kitabxanasında 5 saylı tam orta məktəbin müəllim və şagird heyətinin iştirakı ilə “Cahana sığmayan şair” adlı ədəbi-bədii gecə keçirilib.

Tədbirdə çıxış edən kitabxananın müdir vəzifəsini müvəqqəti icra edən Leyla Mahmudova şairin həyat və yaradıcılığı haqqında ətraflı məlumat verib. Qeyd edib ki, İmadəddin Nəsimi Azərbaycan Respublikasında əsərləri dövlət varidatı elan edilən müəlliflərin siyahısına salınıb.

Şairin həyat və yaradıcılığını əks etdirən “Əbədiyyət üfüqlərində doğan eşq günəşi” adlı sərgidə nümayiş olunan kitabların xülasəsi verilib.

5 saylı tam orta məktəbin şagirdləri Nəsiminin qəzəllərini söyləyib, şairin Sumqayıtda yerləşən heykəli haqqında məlumatı diqqətə çatdırıblar.

Tədbir iştirakçıları ssenari müəllifi İsa Hüseynov, rejissoru Həsən Seyidbəyli olan “Nəsimi” (1973) filmindən fraqment izləyiblər.

Sonda L.Mahmudova Nəsiminin “Hardasan?” qəzəlini qiraət edib.