Gənc rəssamın fərdi sərgisi

Salyan regional “ASAN Xidmət” Mərkəzinin təşkilatçılığı və Salyan Dövlət Rəsm Qalereyasının dəstəyi ilə gənc rəssam Nurlanə Qafarovanın əl işlərindən ibarət “Zəfərin izi ilə” adlı sərgi açılıb.

Mərasimdə Vətən müharibəsi iştirakçıları, qazilər, hərbçilər, sənət adamları və ictimaiyyət nümayəndələri iştirak ediblər.

Bildirilib ki, Nurlanə Qafarova rəsm müsabiqələrində iştirak edib, dəfələrlə qalib olub. O, sonralar bədii yaradıcılığını maketişləmə, memarlıq və heykəltaraşlıq üzrə inkişaf etdirib. Şanlı Zəfərimizlə bağlı işlər onun yaradıcılığında xüsusi yer tutur. Əsərlərində qəhrəmanlarımız, tarixi abidələrimiz, vətənimizin müxtəlif guşələri təsvir olunur.

Çıxışlardan sonra sərgiyə baxış olub. Rəssam əsərləri haqqında məlumat verib. Müəllifin “Şuşanın dağları”, “Gövhər ağa məscidi”, “Xudafərin”, “Topçu Vüsal”, “Zəfər yolu”, “Xarıbülbül”, “Döyüş postu”, “Bayraqdar” və digər əsərləri sərgi iştirakçıları tərəfindən maraqla qarşılanıb.