Bakı Şəhər Mədəniyyət Baş İdarəsi və Azərbaycan Teatr Xadimləri İttifaqının birgə təşkilatçılığı ilə 2025-ci ilin 10-17 mart tarixlərində I Uşaq Teatr Festivalı keçiriləcək.

Azərbaycan peşəkar milli teatrının yaradılmasının 152-ci ildönümü münasibətilə təşkil olacaq festival 6-14 yaş arası uşaqları əhatə edəcək. Festivalın məqsədi Azərbaycan xalq nağıllarının yaşadılması və uşaqlara komanda şəklində işləmə bacarıqları qazandırmaq, səhnə mədəniyyəti ilə tanış olmalarına və öz istedadlarını nümayiş etdirmələrinə şərait yaratmaqdır.

Festivalda maksimum 10 nəfərdən ibarət 15 komanda iştirak edəcək. Komandalar tərəfindən Azərbaycan xalq nağılları əsasında 20-35 dəqiqəlik tamaşalar hazırlanacaq.

Layihənin ideya müəllifi Azərbaycan İncəsənət Məktəbinin (AİM) direktoru Tural Əliyev, layihənin rəhbəri Mədəniyyət üzrə Elmi-Metodiki Mərkəzin metodisti Dağlar Yusif Əfəndi, bədii rəhbəri AİM-in təsisçisi Fərid Bağırov, koordinatoru AİM-in meneceri Rübabə Hüseynovadır.

“Kinderland”, “Ailəm Electronics” və “Ulu Çap” mətbəəsi layihəyə dəstək verəcəklər.

Festivalda iştirak etmək istəyənlər qeydiyyat üçün https://forms.gle/gRJWBkywiqdKxxjh8 linkinə daxil ola bilərlər.