Bakı Şəhər Mədəniyyət Baş İdarəsinin təşkilatçılığı ilə Suraxanı rayon Heydər Əliyev Mərkəzində “Retro görüş” adlı yeni layihə çərçivəsində Xalq artisti, görkəmli bəstəkar, professor Siyavuş Kərimi ilə görüş keçirilib.

Görüşdə Xalq artistinin yaradıcılığı haqqında məlumat verilib. Bildirilib ki, Siyavuş Kərimi çox sayda musiqi əsərlərinin müəllifidir. Onu geniş xalq kütləsinə tanıdan lirik mahnılarıdır. O, bəstəkar və xalq mahnılarının gözəl aranjimançısı kimi də məşhurdur. Siyavuş Kərimi çox sayda teatr tamaşalarına yazdığı musiqi ilə müasir Azərbaycan teatr sənətinin inkişafına da öz töhfəsini verib. Yaradıcılığında kino musiqisi də mühüm yer tutur. Bəstəkarın bir sıra filmlərə yazdığı musiqi ekran əsərlərinin bədii təsir qüvvəsini daha da artırıb.

Bəstəkar çıxışında tədbirin təşkilinə görə təşəkkürünü bildirib və tamaşaçıların suallarını cavablandırıb.

Sonra tədbir bədii hissə ilə davam edib.