C.Cabbarlı adına Respublika Gənclər Kitabxanasında Mədəniyyət Nazirliyi yanında İctimai Şuranın növbəti iclası keçirilib.

İclasda mədəniyyət nazirinin müavini Fərid Cəfərov, nazirliyin Mədəniyyət üzrə Elmi-Metodiki və İxtisasartırma Mərkəzinin direktor müavini Seymur Hüseynov da iştirak ediblər.

İctimai şuranın sədri akademik Nizami Cəfərov ötən müddətdə həyata keçirilən tədbirlər, illik hesabatın hazırlanması və qarşıda duran digər cari məsələlər barədə məlumat verib.

İctimai şuranın sədr müavinləri Əkbər Qoşalı və Vüqar Qədirov indiyədək ictimai dinləmə keçirilməmiş bütün regionlarda bu prosesin təşkil olunmasının önəmini vurğulayıb, habelə bir sıra həlli vacib məsələlər haqqında fikirlərini bölüşüblər.

İclasda şura üzvləri – Əməkdar incəsənət xadimi Ayaz Salayev, Xanoğlan Əhmədov, Samirə Mustafayeva çıxış edərək şuraya edilən müraciətlər, qaldırılan problemlər, təşəbbüs və təkliflər barədə danışıblar.

Nazir müavini Fərid Cəfərov iclasın sonunda çıxış edərək toxunulan məsələlərə, irəli sürülən təkliflərə münasibət bildirib.