Abşeron rayon Mədəniyyət Mərkəzində Azərbaycan ədəbiyyatını yeni poetik obrazlarla zənginləşdirərək, onun inkişafında özünəməxsus rol oynamış görkəmli söz ustası Nəbi Xəzrinin 100 illik yubileyi qeyd edilib.

AZƏRTAC xəbər verir ki, Abşeron-Xızı Regional Mədəniyyət İdarəsinin təşkilatçılığı, Abşeron Rayon İcra Hakimiyyəti və Azərbaycan Yazıçılar Birliyinin Abşeron rayon bölməsinin dəstəyi ilə keçirilən tədbirdə Xalq şairinin ailə üzvləri, mədəniyyət işçiləri və rayon ictimaiyyətinin nümayəndələri iştirak ediblər.

Görkəmli ictimai xadim, Dövlət mükafatları laureatı Nəbi Xəzrinin ömür yolundan və yaradıcılığından bəhs edən videoçarx təqdim olunub.

Tədbirdə şairin şeirləri səslənib, sözlərinə yazılan mahnılar ifa olunub, habelə Nəbi Xəzrinin məzun olduğu Xırdalan şəhər 4 nömrəli tam orta məktəbin şagirdlərinin ifasında maraqlı bədii kompozisiya nümayiş etdirilib.

Şairin oğlu Arzu Babayev atasının xatirəsinə göstərilən diqqətə görə minnətdarlığını bildirib.