Azərbaycan turizm təmsilçilərinin Türkiyənin termal mənbələrinə tanışlıq turu

Oktyabrın 2-dən 7-dək Türk Hava Yolları, "NG Hotel Group", "Nobel" Tibb Mərkəzi və "Kaya Termal"ın dəstəyi, Azərbaycan Sağlamlıq və Termal Turizmə Dəstək Assosiasiyasının təşkilatçılığı ilə Türkiyənin termal turizm mənbələrinə infotur təşkil olundu. İnfoturda Azərbaycanda fəaliyyət göstərən turizm şirkətləri, sağlamlıq turizmi obyektləri və media vasitələrinin nümayəndələrindən ibarət heyət iştirak edirdi. Səfər Türkiyənin əsas termal turizm mənbələrinin yerləşdiyi Afyon, Dənizli və İzmir-Balçova bölgələrini və burada yerləşən hotelləri, xəstəxanaları əhatə edirdi.

Tur iştirakçıları bu məkanların sağlıq turizmi imkanları ilə bağlı ətraflı məlumat aldılar. Eyni zamanda iki ölkənin turizm təmsilçiləri bir-biri ilə təcrübələrini bölüşdü, nümunəvi sağlamlıq turizmi klasterlərinin yaranması imkanlarını dəyərləndirdilər. Bundan əlavə, səfər müddətində müxtəlif rəsmilərlə görüşlər və kiçik seminarlar təşkil edildi.
Səfər müddətində iştirakçılar əvvəlcə Afyonun termal turizm təsislərindən olan "Korel Termal", "İkbal Termal" və "Oruçoğlu Termal"la tanış oldular. Bölgədə 26 termal mənbə, bunun 13-ü fəaliyyət göstərməkdədir. Burada hər bir hotel bir mənbənin üzərində yerləşir. Lakin müalicəvi effektinə gəlincə, suların təsiri eynidir. Bu termal sulardan əsasən oynaq xəstəliklərinin, bel və boyun ağrılarının, sinir və müxtəlif dəri xəstəliklərinin, şəkərli diabetin müalicəsində istifadə olunur.

“Aviareyslərin 3-5 faizi sağlamlıq turizmi istiqamətində reallaşsın"

"NG Afyon Hotel"də düzənlənən dəyirmi masada Afyonun dövlət və özəl qurumlarının təmsilçiləri iştirak edirdi. Afyon valisinin köməkçisi Erhan Günay bölgənin turizm imkanları haqqında məlumat verərək bildirdi ki, dövlət bu sektorun inkişafı üçün mümkün olan bütün vasitələrdən istifadə edir.
Nümayəndə heyətinə başçılıq edən Azərbaycan Sağlamlıq və Termal Turizmə Dəstək Assosiasiyasının sədri Ruslan Quliyev səfərin məqsədindən danışaraq bildirdi ki, hər iki ölkənin zəngin sağlamlıq turizmi imkanları var və turizmçilər bu imkanları dəyərləndirib əməkdaşlıq etməlidir: "Bizim səfərimizin məqsədi də budur ki, Türkiyənin əsas sağlıq turizmi təsisləri ilə əlaqələr quraq. Türk Hava Yolları aviaşirkəti Azərbaycanla Türkiyə arasında il ərzində 750-yə yaxın uçuş həyata keçirir. İstəyirik bu uçuşların ən azı 3-5 faizi məhz sağlamlıq turizmi istiqamətində reallaşsın".
Azərbaycan dövlətinin qeyri-neft sektorunda turizmin inkişafına çox böyük diqqət yetirdiyini deyən R.Quliyev ölkə başçısının son vaxtlar bu istiqamətdə imzaladığı fərman və sərəncamlar haqqında məlumat verdi. Bildirdi ki, turizmin inkişafı artıq Azərbaycanda prioritet istiqamət elan edilib.
"Agne Tours" şirkətinin idarə heyətinin prezidenti Ali Kaya Afyonda termal turizmin potensialından lazımi qədər istifadə olunmadığını dedi. Çünki bölgədəki hotellər öz fəaliyyətlərini daha çox daxili bazara istiqamətləndirib. Halbuki xarici ölkələrlə, o cümlədən Azərbaycanla yaxın əməkdaşlıq qurmaqla bölgəyə daha çox turist gətirmək mümkündür.
Qarşılıqlı fikir mübadiləsi ilə keçən dəyirmi masa sonra iki ölkənin turizm şirkətləri təmsilçilərinin B&B formatlı görüşləri ilə davam etdi, bir sıra əməkdaşlıq müqavilələri imzalandı.

Termal turizmin cənnəti - Dənizli

İnfotur iştirakçıları oktyabrın 3-də Türkiyənin daha bir termal turizm cənnəti olan Dənizliyə səfər etdilər. Heyəti Cənubi Ege İnkişaf Agentliyi (GEKA) mütəxəssisləri müşayiət edirdi. Səfər çərçivəsində Pamukkale, Hierapolis, Tripolis və Buldan kimi tarixi və eyni zamanda termal turizm sahəsində fəaliyyət göstərən təsislər, müxtəlif sağlamlıq-müalicə mərkəzləri ilə tanışlıq oldu. Türkiyənin qədim tarixini və müasir turizm infrastrukturunu özündə birləşdirən Pamukkale ilə tanışlıq xüsusilə yadda qaldı.
Dənizlinin ən böyük sağlamlıq turizmi mərkəzləri olan "Pam Hotel", "Colossae" SPA Hoteli, "Nobel" Tibb Mərkəzi, "Tekden" sağlamlıq mərkəzlərində bu təsislərin imkanları barədə məlumat verildi.
Azərbaycanlı qonaqları Dənizli valisi Ahmed Altıparmaq qəbul etdi. Vali iki qardaş ölkənin tarixi əlaqələrindən, türk əsgərlərinin Azərbaycanın, Azərbaycan əsgərlərinin də Türkiyənin azadlığı uğrunda döyüşüb şəhid olmasından söz açdı. “Bir millətin iki dövləti olan Azərbaycanla Türkiyə, bütün sahələrdə olduğu kimi, turizm sahəsində də yaxından əməkdaşlıq etməlidir” - deyən vali, bu səbəbdən infoturu yüksək dəyərləndirdiyini diqqətə çatdırdı.
Görüşdə Ruslan Quliyev Azərbaycanın turizm imkanları, son illər ölkədə qurulan yüksək səviyyəli infrastruktur, Naftalan neftinin, Qalaaltı suyunun müalicəvi xüsusiyyətləri barədə valiyə məlumat verdi. Valiyə Azərbaycanın milli mədəniyyətini əks etdirən xatirə hədiyyəsi təqdim edildi.
Görüşdən sonra vali azərbaycanlı media mənsublarına müsahibə verdi.
Səfər proqramı Dənizlinin tarixi məkanlarında - Pamukkale və Buldanda davam etdirildi. Bu əsrarəngiz məkanlar haqqında növbəti sayımızda.

Mehparə Sultanova
Ankara